సాధారణంగా ఎవరైనా మరణించిన తర్వాత వారి పిల్లలు లేదా కుటుంబ సభ్యులు అంత్యక్రియలు, కర్మకాండలు నిర్వహించడం ఆనవాయతీ. అయితే, ఉత్తరప్రదేశ్‌కు చెందిన ఓ 80 ఏళ్ల వృద్ధుడు మాత్రం తన మరణానంతరం తన ఏకైక కుమార్తెపై ఎలాంటి ఆర్థిక, సామాజిక భారం పడకూడదనే ఉద్దేశంతో బతికుండగానే తన పెద్దకర్మ (తెహ్రవీ) వేడుకను ఘనంగా నిర్వహించుకున్నారు. సమాజంలో మూస పద్ధతులకు భిన్నంగా ఆయన తీసుకున్న ఈ నిర్ణయం ప్రస్తుతం అందరి దృష్టినీ ఆకర్షిస్తోంది.

ఉత్తరప్రదేశ్‌లోని బాగ్‌పత్ జిల్లా బరౌత్ ప్రాంతం పరిధిలోని జొహ్రీ గ్రామానికి చెందిన 80 ఏళ్ల బలజోర్ సింగ్‌కు పింకీ అనే ఒక్కగానొక్క కుమార్తె ఉంది. ఆయనకు కుమారులు లేరు. తన మరణానంతరం నిర్వహించాల్సిన సాంప్రదాయ కర్మకాండలు, వాటికి అయ్యే ఖర్చులు తన కుమార్తెకు భారంగా మారకూడదని బలజోర్ సింగ్ భావించారు. "నాకు కొడుకు లేడు. నా మరణం తర్వాత నా కూతురిపై ఈ బాధ్యతల భారం పడకూడదనే ఉద్దేశంతోనే జీవించి ఉండగానే ఈ నిర్ణయం తీసుకున్నాను" అని ఆయన స్పష్టం చేశారు. బాధ్యతలను కుమార్తెపై వదిలేయకుండా తానే స్వయంగా పూర్తి చేయాలని నిర్ణయించుకున్నారు.

ఇందులో భాగంగా నవంబర్ 15న జొహ్రీ గ్రామంలో ఈ కార్యక్రమాన్ని నిర్వహించారు. వేద పండితుల ఆధ్వర్యంలో సాంప్రదాయబద్ధంగా హవనం (హోమం) జరిపించారు. ఈ వేడుకకు దాదాపు 900 మంది గ్రామస్థులు, బంధువులు హాజరయ్యారు. వచ్చిన అతిథుల కోసం 8 మంది వంట మనుషులతో పూరీలు, కూరలు, మిఠాయిలతో కూడిన భోజన ఏర్పాట్లు చేశారు. ఇదే సమయంలో కుటుంబ సంప్రదాయం ప్రకారం, తన మనవడు ముకుల్ తలకు బలజోర్ సింగ్ పగడీ (తలపాగా) చుట్టారు. దీని ద్వారా కుటుంబ బాధ్యతలను అధికారికంగా తర్వాతి తరానికి అప్పగించినట్లయింది. ఈ వేడుకకు ఉత్తరప్రదేశ్ మంత్రి కేపీ సింగ్ కూడా హాజరై బలజోర్ సింగ్‌ను అభినందించారు.

తన తండ్రి తీసుకున్న ఈ నిర్ణయంపై కుమార్తె పింకీ సంతోషం వ్యక్తం చేశారు. తన తండ్రి నిండు నూరేళ్లు ఆయురారోగ్యాలతో జీవించి, కుటుంబానికి మార్గదర్శకంగా కొనసాగాలని ఆమె ఆకాంక్షించారు.