పాకిస్థాన్ క్రికెట్‌లో ఓ యువ కెరటం సంచలనం సృష్టించింది. 20 ఏళ్ల యువ బ్యాటర్ తయ్యబ్ అరిఫ్.. తాను ఆడుతున్న తొలి టెస్ట్ మ్యాచ్‌లోనే జాతీయ రికార్డును తిరగరాశాడు. శ్రీలంకతో రావల్పిండి వేదికగా జరుగుతున్న మొదటి టెస్టులో అరంగేట్రం చేసిన అరిఫ్, మెరుపు వేగంతో అర్ధశతకం బాది అందరి దృష్టిని ఆకర్షించాడు. కేవలం 46 బంతుల్లోనే ఫిఫ్టీ మార్క్ అందుకొని, పాకిస్థాన్ తరఫున టెస్ట్ అరంగేట్రంలో అత్యంత వేగవంతమైన హాఫ్ సెంచరీ నమోదు చేసిన ఆటగాడిగా చరిత్రకెక్కాడు.

ఓపెనర్‌గా బరిలోకి దిగిన అరిఫ్, తన తొలి ఇన్నింగ్స్‌లోనే ఏమాత్రం బెరుకు లేకుండా శ్రీలంక బౌలర్లపై విరుచుకుపడ్డాడు. కేవలం 51 బంతుల్లో 9 ఫోర్లు, ఒక సిక్సర్‌తో 57 పరుగుల అద్భుత ఇన్నింగ్స్ ఆడాడు. మరో ఓపెనర్ ఆజాన్ అవైస్‌తో కలిసి మొదటి వికెట్‌కు 86 పరుగుల కీలక భాగస్వామ్యం నెలకొల్పాడు. దూకుడుగా ఆడుతున్న క్రమంలో అసిత ఫెర్నాండో బౌలింగ్‌లో క్యాచ్ ఇచ్చి వెనుదిరిగాడు.

ఈ ప్రదర్శనతో అరిఫ్ ఓ అరుదైన రికార్డును తన ఖాతాలో వేసుకున్నాడు. గతంలో పాకిస్థాన్ తరఫున రజాఉల్లా 43 బంతుల్లో ఫిఫ్టీ సాధించినా, అది తన రెండో ఇన్నింగ్స్‌లో కావడం గమనార్హం. అయితే, అరిఫ్ తన తొలి ఇన్నింగ్స్‌లోనే ఈ ఫీట్ అందుకోవడం విశేషం. కాగా, టెస్ట్ అరంగేట్రంలో అత్యంత వేగవంతమైన ఫిఫ్టీ ప్రపంచ రికార్డు మాత్రం దక్షిణాఫ్రికా ఆటగాడు డ్యూవాల్డ్ బ్రెవిస్ (38 బంతులు) పేరిట ఉంది.

బాబర్ ఆజమ్ కెప్టెన్సీలోని పాక్ జట్టు ఈ మ్యాచ్‌లో నలుగురు కొత్త ఆటగాళ్లకు అవకాశం ఇచ్చింది. తయ్యబ్ అరిఫ్‌తో పాటు మొహమ్మద్ తహా, అరాఫత్ మిన్హాస్, సాకిబ్ ఖాన్ కూడా టెస్టుల్లోకి అడుగుపెట్టారు. తొలి రోజు ఆట ముగిసే సమయానికి పాకిస్థాన్ 5 వికెట్ల నష్టానికి 281 పరుగులు చేసింది.