టీమిండియా యువ క్రికెటర్, వరల్డ్ నెం.1 టీ20 బ్యాటర్ అభిషేక్ శర్మ తన కుటుంబంతో కలిసి దీపావళి పండుగను ఘనంగా జరుపుకున్నాడు. పంజాబ్‌లోని అమృత్‌సర్‌లో ఉన్న తన నివాసంలో కుటుంబ సభ్యుల మధ్య సందడి చేశాడు. ఈ వేడుకలకు సంబంధించిన ఒక వీడియో ఇప్పుడు సోషల్ మీడియాలో వైరల్‌ అవుతోంది.

అభిషేక్ సోదరి కోమల్ శర్మ తన ఇన్‌స్టాగ్రామ్‌లో ఈ వీడియోను పోస్ట్ చేశారు. ఇందులో అభిషేక్ తన తల్లిదండ్రులు, బంధుమిత్రులతో కలిసి ప్రముఖ గాయకుడు దలేర్ మెహందీ పాడిన 'బోలో త ర ర' పాటకు ఉత్సాహంగా డాన్స్ చేస్తూ కనిపించాడు. ఈ వీడియోకు ఆమె "'బోలో త ర ర... #MandatoryRitual" (ఇది మా ఇంట్లో తప్పనిసరి కార్యక్రమం) అని క్యాప్షన్ జోడించారు. 

పండుగ దీపాల వెలుగులో, సంప్రదాయ దుస్తులు ధరించిన అభిషేక్ కుటుంబంతో కలిసి స్టెప్పులేయడం అభిమానులను ఆకట్టుకుంటోంది. దీనితో పాటు తన ఇంట్లో జరిగిన దీపావళి పూజకు సంబంధించిన ఫోటోలను కూడా అభిషేక్ పంచుకున్నాడు.

ఇక, క్రికెట్ విషయానికి వస్తే.. అభిషేక్ శర్మ త్వరలో జరగనున్న ఏసీసీ మెన్స్ రైజింగ్ స్టార్స్ ఆసియా కప్‌కు ఎంపికయ్యాడు. ఈ నెల‌ 19 నుంచి 29 వరకు దోహా వేదికగా జరిగే ఈ టోర్నీ కోసం ప్రకటించిన 15 మంది సభ్యుల ఇండియా ఏ జట్టులో అతనికి చోటు దక్కింది. ఈ జట్టుకు తిలక్ వర్మ కెప్టెన్‌గా వ్యవహరించనుండగా, రింకూ సింగ్, ప్రభ్‌సిమ్రాన్ సింగ్ వంటి ఆటగాళ్లు కూడా ఉన్నారు. గ్రూప్-బిలో ఉన్న ఇండియా ఏ జట్టు... యూఏఈ, నేపాల్, పాకిస్థాన్ ఏ జట్లతో తలపడనుంది.