ఇంగ్లండ్ అండ్ వేల్స్ క్రికెట్ బోర్డు (ఈసీబీ) తీవ్ర ఆర్థిక సంక్షోభాన్ని ఎదుర్కోనుంది. 2027లో సొంతగడ్డపై ప్రతిష్ఠాత్మక యాషెస్ సిరీస్ జరగనున్నప్పటికీ, ఆ ఏడాది ఈసీబీకి సుమారు 50 మిలియన్ పౌండ్ల (దాదాపు రూ. 627 కోట్లు) భారీ నష్టం తప్పదని అంచనాలు వెలువడుతున్నాయి. దీనికి ప్రధానంగా రెండు కారణాలు కనిపిస్తున్నాయి. ఒకటి, అత్యధిక వాణిజ్య ఆదాయాన్ని తెచ్చిపెట్టే భారత జట్టు పర్యటన ఆ ఏడాది లేకపోవడం. రెండోది, ఐసీసీ నుంచి రావాల్సిన ఆదాయంలో కోత పడనుండటం. ఈ రెండు పరిణామాలు ఇంగ్లండ్ క్రికెట్‌ను ఆర్థికంగా తీవ్ర ఇబ్బందుల్లోకి నెట్టనున్నాయి.

'గార్డియన్' పత్రిక తన కథనంలో వెల్లడించిన ప్రకారం.. ఈసీబీ ఆర్థిక అంచనాలు తలకిందులయ్యేలా ఉన్నాయి. సాధారణంగా ఇంగ్లండ్‌లో పర్యటించే జట్లను బట్టి బ్రాడ్‌కాస్టింగ్ ఆదాయంలో హెచ్చుతగ్గులు ఉంటాయి. భారత జట్టు పర్యటన ఉన్నప్పుడు ఈసీబీకి వాణిజ్యపరంగా భారీ ఆదాయం సమకూరుతుంది. అయితే, 2027లో టీమిండియా టూర్ లేకపోవడంతో ఈసీబీకి అతిపెద్ద ఆదాయ వనరు దూరమైనట్టయింది. దీనికి తోడు 2027లో సభ్య దేశాలకు పంపిణీ చేయాల్సిన ఆదాయంలో కొంత భాగాన్ని నిలిపివేయాలని ఐసీసీ నిర్ణయించడం మరో షాక్‌. ఇది 12 పూర్తిస్థాయి సభ్య దేశాలపై ప్రభావం చూపనుండగా, ఈసీబీ ఆర్థిక ప్రణాళికలను మరింత సంక్లిష్టంగా మార్చింది.

ఐసీసీ ఆదాయాన్ని ఎందుకు నిలిపివేస్తోంది?
2028 నుంచి ప్రారంభమయ్యే తదుపరి వాణిజ్య ఒప్పందాల కాలంలో (నెక్స్ట్ కమర్షియల్ సైకిల్) బ్రాడ్‌కాస్టింగ్ డీల్ బలహీనంగా ఉండొచ్చని ఐసీసీ అంచనా వేస్తోంది. ఈ నేపథ్యంలో 2027లో సభ్య దేశాలకు ఇవ్వాల్సిన మొత్తంలో కొంత పక్కన పెట్టడం ద్వారా భవిష్యత్తులో ఆదాయం ఆకస్మికంగా పడిపోకుండా జాగ్రత్త పడుతోంది. వాస్తవానికి ప్రస్తుత సైకిల్‌కు 2027 చివరి ఏడాది. ఈ సంవత్సరంలో పురుషుల 50 ఓవర్ల ప్రపంచకప్ కూడా జరగనుంది. ఇది ఐసీసీకి అతిపెద్ద వాణిజ్య ఆస్తి. సాధారణంగా ఇలాంటి సమయంలో సభ్య దేశాలకు అధిక మొత్తంలో చెల్లింపులు జరుగుతాయి. కానీ, ఐసీసీ దీనికి భిన్నంగా వ్యవహరిస్తుండటం గమనార్హం.

ఈసీబీపై తీవ్ర ప్రభావం
ఇంగ్లండ్ క్రికెట్ ఆర్థిక వ్యవస్థ ఎక్కువగా భారత మార్కెట్‌పైనే ఆధారపడి ఉంది. భారత్ నుంచి వచ్చే బ్రాడ్‌కాస్టింగ్, వీక్షకుల ఆదాయం ఈసీబీ వాణిజ్య ఒప్పందాల విలువను నిర్ణయించడంలో కీలకపాత్ర పోషిస్తాయి. ప్రస్తుతం సోనీ పిక్చర్స్‌తో ఈసీబీకి ఉన్న 185 మిలియన్ పౌండ్ల (సుమారు రూ. 2,323 కోట్లు) ఆరేళ్ల బ్రాడ్‌కాస్టింగ్ ఒప్పందం 2028లో ముగియనుంది. తదుపరి ఒప్పందం ద్వారా ఇంతకంటే చాలా తక్కువ ఆదాయం రావొచ్చని అంచనాలున్నాయి.

ఈ ఆర్థిక నష్టం కేవలం జాతీయ బోర్డుకే పరిమితం కాకుండా, ఇంగ్లండ్ దేశవాళీ క్రికెట్ వ్యవస్థ అయిన కౌంటీలపై కూడా తీవ్ర ప్రభావం చూపనుంది. ఇప్పటికే 18 కౌంటీల్లో పది నష్టాల్లో ఉన్నట్టు నివేదికలు చెబుతున్నాయి. చాలా కౌంటీలు ఈసీబీ నుంచి అందే ఆర్థిక సాయంపైనే ఆధారపడి ఉన్నాయి. బోర్డు ఆదాయం భారీగా తగ్గితే, కౌంటీలకు అందే నిధులు కూడా తగ్గిపోయి దేశవాళీ క్రికెట్ మరింత కష్టాల్లో పడే ప్రమాదం ఉంది. నష్టాన్ని 35 మిలియన్ పౌండ్లకు పరిమితం చేసేందుకు ఈసీబీ ప్రయత్నిస్తున్నప్పటికీ, 2027 ఇంగ్లండ్ క్రికెట్‌కు గడ్డుకాలమనేది స్పష్టంగా కనిపిస్తోంది.