అండర్-19 ఆసియా కప్ 2026 టోర్నీలో భాగంగా దాయాది దేశం పాకిస్థాన్‌తో గ్రూప్-ఎ మ్యాచ్‌లో భారత అండర్-19 జట్టు 208 పరుగులకు ఆలౌట్ అయింది. ఒమన్‌లోని అల్ అమ్రత్ క్రికెట్ గ్రౌండ్‌లో జరుగుతున్న ఈ సమరంలో టాస్ గెలిచిన భారత్ తొలుత బ్యాటింగ్ ఎంచుకుంది. అయితే, పాకిస్థాన్ బౌలర్లు కట్టుదిట్టంగా బౌలింగ్ చేయడంతో భారత బ్యాటర్లు వరుసగా పెవిలియన్ బాట పట్టారు. క్లిష్ట పరిస్థితుల్లో మిడిలార్డర్ బ్యాటర్ అర్జున్ రాజ్‌పుత్ అద్భుత శతకంతో చెలరేగడంతో భారత్ పోరాడే స్థాయి స్కోరును నమోదు చేయగలిగింది.

భారత ఇన్నింగ్స్ ఆరంభం నుంచే తీవ్ర ఒడుదొడుకులను ఎదుర్కొంది. ఇన్నింగ్స్ రెండో బంతికే కెప్టెన్ లక్ష్య రాజేష్ రాయ్‌చందాని పరుగులేమీ చేయకుండానే అలీ రజా బౌలింగ్‌లో క్లీన్ బౌల్డ్ అయ్యాడు. అనంతరం వచ్చిన వి.కె. వినీత్ (8), యశ్‌వర్ధన్ చౌహాన్ (1) పాక్ పేసర్ల ధాటికి ఎక్కువసేపు నిలవలేకపోయారు. నిలకడగా ఆడే ప్రయత్నం చేసిన ఓపెనర్ ఆర్యవీర్ సెహ్వాగ్ (22) కూడా నికాబ్ షఫీక్ బౌలింగ్‌లో వెనుదిరగడంతో, భారత్ కేవలం 42 పరుగులకే 4 కీలక వికెట్లు కోల్పోయి తీవ్ర ఒత్తిడిలో పడింది.

ఈ దశలో క్రీజులోకి వచ్చిన అర్జున్ రాజ్‌పుత్ జట్టును అద్భుతంగా ఆదుకున్నాడు. సహచరుల నుంచి పెద్దగా మద్దతు లభించకపోయినా, అతడు ఒంటిచేత్తో మ్యాచ్ స్వరూపాన్ని మార్చేశాడు. అన్వయ్ ద్రవిడ్ (10) తో కలిసి ఐదో వికెట్‌కు 44 పరుగులు, మనాల్ చౌహాన్ (11) తో కలిసి ఆరో వికెట్‌కు 64 పరుగుల విలువైన భాగస్వామ్యాలను నెలకొల్పాడు. పాక్ బౌలర్లపై ఎదురుదాడికి దిగిన అర్జున్.. 85 బంతుల్లో 11 ఫోర్లు, 5 భారీ సిక్సర్లతో మెరుపు వేగంతో 107 పరుగులు సాధించి జట్టుకు గౌరవప్రదమైన స్కోరును అందించాడు. సెంచరీ పూర్తయిన కాసేపటికే రిజ్వానుల్లా బౌలింగ్‌లో ఫర్హాన్ యూసఫ్‌కు క్యాచ్ ఇచ్చి అతడు పెవిలియన్ చేరాడు.

చివర్లో కావ్య పటేల్ (23) కాసేపు క్రీజులో నిలిచి కీలక పరుగులు జోడించాడు. యశ్వీర్ గౌడ్ (4), మోహిత్ ఉల్వా (7) స్వల్ప స్కోర్లకే అవుటవగా, ఇషాన్ సూద్ (2) నాటౌట్‌గా నిలిచాడు. చివరకు భారత జట్టు 46.3 ఓవర్లలో 208 పరుగులకు ఆలౌట్ అయింది. పాకిస్థాన్ బౌలర్లలో అలీ రజా (3/37), రిజ్వానుల్లా (3/24), నికాబ్ షఫీక్ (3/42) తలో మూడు వికెట్లు పడగొట్టి భారత ఇన్నింగ్స్‌ను దెబ్బతీయగా, మహమ్మద్ సయ్యమ్‌కు ఒక వికెట్ దక్కింది. పాకిస్థాన్ ముందు భారత్ 209 పరుగుల లక్ష్యాన్ని నిర్దేశించింది.