విశాఖపట్నం నగరంలోని రుషికొండ బీచ్‌లో అరుదైన, ఆసక్తికరమైన దృశ్యం ఆవిష్కృతమైంది. భారత కోస్ట్ గార్డ్‌కు చెందిన రెండు భారీ హోవర్‌క్రాఫ్ట్‌లు అనూహ్యంగా తీరానికి చేరుకున్నాయి. గోవా నుంచి పశ్చిమ బెంగాల్‌లోని హల్దియాకు విధి నిర్వహణ నిమిత్తం వెళుతున్న ఈ నౌకలు, సముద్రంలో ఏర్పడిన ప్రతికూల వాతావరణం, బలమైన గాలుల కారణంగా ఇంధనం నింపుకోవడానికి ఇక్కడ ఆగాల్సి వచ్చింది.

సాధారణంగా సముద్రంలో మాత్రమే కనిపించే నౌకలు.. ఒక్కసారిగా ఇసుక తిన్నెలపైకి దూసుకురావడంతో పర్యాటకులు, స్థానికులు ఆశ్చర్యపోయారు. నీటిపైనా, నేలపైనా సునాయాసంగా కదులుతున్న ఈ హోవర్‌క్రాఫ్ట్‌లను చూసేందుకు పెద్ద సంఖ్యలో జనం గుమిగూడారు. విశాఖ తీరంలో ఇలాంటి దృశ్యం కనిపించడం చాలా అరుదు కావడంతో, పలువురు తమ ఫోన్లలో ఆ దృశ్యాలను బంధించారు.

ఈ హోవర్‌క్రాఫ్ట్‌లు పూర్తిగా స్వదేశీ పరిజ్ఞానంతో తయారయ్యాయి. ఇవి 'ఎయిర్ కుషన్' టెక్నాలజీతో పనిచేస్తాయి. దీనివల్ల సాధారణ బోట్లలా కాకుండా నీరు, ఇసుక, భూమి వంటి ఎలాంటి ఉపరితలంపై అయినా సాఫీగా ప్రయాణించగలవు. నీటిలో గంటకు సుమారు 96 కిలోమీటర్ల వేగంతో ప్రయాణించే సామర్థ్యం ఉన్న ఈ నౌకల్లో ఒకేసారి 42 మంది సిబ్బంది ప్రయాణించవచ్చు. తీర ప్రాంత గస్తీ, అక్రమ రవాణాను అడ్డుకోవడం, సముద్రంలో ప్రమాదాల్లో చిక్కుకున్న వారిని రక్షించడం వంటి కీలకమైన విధుల్లో కోస్ట్ గార్డ్ ఈ హోవర్‌క్రాఫ్ట్‌లను ఉపయోగిస్తుంది.

ఈ నౌకలు కేవలం ఇంధనం నింపుకోవడానికే తాత్కాలికంగా ఇక్కడ ఆగాయని రుషికొండ మెరైన్ పోలీసు అధికారి కె. అశోక్ కుమార్ తెలిపారు. వాతావరణం అనుకూలించగానే తిరిగి పశ్చిమ బెంగాల్‌కు తమ ప్రయాణాన్ని కొనసాగిస్తాయని ఆయన స్పష్టం చేశారు.