పాపం బాబర్‌ ఆజమ్‌.. ఫామ్‌ అందుకోవాలని దేశవాళీ క్రికెట్‌లోకి అడుగుపెడితే అక్కడా నిరాశే ఎదురైంది. శ్రీలంకతో టెస్టు సిరీస్‌కు ముందు కాస్త పరుగులు చేసి ఆత్మవిశ్వాసం పెంచుకుందామనుకున్న పాక్‌ స్టార్‌కు రెండు ఇన్నింగ్స్‌ల్లోనూ చుక్కెదురైంది. స్వల్ప పరుగులకే పెవిలియన్‌ బాట పట్టాల్సి వచ్చింది. దీంతో మైదానంలోనే అసహనం బయటపెట్టాడు. ఔటై డ్రెస్సింగ్‌ రూమ్‌కు వెళుతూ బ్యాట్‌ను నేలకేసి కొట్టాడు. ఇందుకు సంబంధించిన వీడియో ఇప్పుడు సోషల్‌ మీడియాలో వైరల్‌గా మారింది.

పాకిస్థాన్‌ దేశవాళీ టోర్నీ ఖైద్‌-ఎ-ఆజమ్‌ ట్రోఫీలో లాహోర్‌ వైట్స్‌ తరఫున బాబర్‌ ఆడుతున్నాడు. ఫటా జట్టుతో జరిగిన మ్యాచ్‌లో తొలి ఇన్నింగ్స్‌లో 28 పరుగులే చేశాడు. రెండో ఇన్నింగ్స్‌లోనైనా భారీ స్కోరు సాధిస్తాడని అభిమానులు ఆశిస్తే.. 42 పరుగులకే ఔటయ్యాడు. 77 బంతులు ఎదుర్కొన్న బాబర్‌.. షాహిద్‌ అజీజ్‌ వేసిన బంతిని వదిలేయాల్సింది పోయి క్లిక్‌ చేశాడు. ఆఫ్‌ స్టంప్‌కు చాలా దూరంగా వెళ్లిన బంతిని శరీరానికి దూరంగా ఆడటంతో బ్యాట్‌ అంచుకు తగిలి ఫస్ట్‌ స్లిప్‌లో క్యాచ్‌గా మారింది. అంతే.. మరోసారి పెవిలియన్‌ దారి పట్టాల్సి వచ్చింది. ఈసారి మాత్రం నిరాశను దాచుకోలేక బ్యాట్‌ను నేలపై బలంగా కొట్టాడు.

ఇక మ్యాచ్‌లోనూ లాహోర్‌కు చేదు అనుభవమే ఎదురైంది. తొలుత బ్యాటింగ్‌ చేసిన ఫటా 362 పరుగులు చేసింది. ఫవాద్‌ అర్షద్‌ 115 పరుగులతో రాణించాడు. లాహోర్‌ తొలి ఇన్నింగ్స్‌లో 234 పరుగులకే ఆలౌటైంది. అలీ జర్యాబ్‌ 51 పరుగులు చేశాడు. రెండో ఇన్నింగ్స్‌లో మహమ్మద్‌ ఫరూక్‌ 123 పరుగులతో చెలరేగడంతో ఫటా 283 పరుగులు సాధించింది. దీంతో లాహోర్‌ ముందు 412 పరుగుల లక్ష్యం నిలిచింది. కానీ ఆ జట్టు 170 పరుగులకే కుప్పకూలింది. ఫటా 241 పరుగుల భారీ విజయాన్ని అందుకుంది.

ఇప్పుడు బాబర్‌కు మరో దేశవాళీ మ్యాచ్‌ ఆడే అవకాశం కూడా లేదు. ఈ నెల 9 నుంచి రావల్పిండిలో శ్రీలంకతో పాకిస్థాన్‌ తొలి టెస్టు ఆడనుంది. మరి దేశవాళీ క్రికెట్‌లో పరుగుల కోసం తంటాలు పడుతున్న బాబర్‌.. అంతర్జాతీయ టెస్టు వేదికపై అయినా తన బ్యాట్‌కు పని చెబుతాడేమో చూడాలి!