ఫేస్‌బుక్ మాతృసంస్థ మెటా సీఈఓ మార్క్ జుకర్‌బర్గ్ సంపద ఒక్కరోజులోనే అమాంతం పెరిగింది. సోమవారం ట్రేడింగ్‌లో ఆయన ఏకంగా 25 బిలియన్ డాలర్లు (భారత కరెన్సీలో సుమారు రూ. 2.39 లక్షల కోట్లకు పైగా) ఆర్జించారు. ఆర్టిఫిషియల్ ఇంటెలిజెన్స్ (ఏఐ) రంగంలో మెటా ప్రకటించిన కొత్త ప్రణాళికలతో కంపెనీ షేర్లు దాదాపు 12 శాతం పెరగడమే ఇందుకు ప్రధాన కారణం. ఈ భారీ పెరుగుదలతో జుకర్‌బర్గ్ మొత్తం సంపద సుమారు 253.6 బిలియన్ డాలర్లకు చేరినట్లు ఫోర్బ్స్ అంచనా వేసింది.

ఈ అనూహ్య లాభంతో జుకర్‌బర్గ్.. ఫోర్బ్స్ రియల్-టైమ్ బిలియనీర్ల జాబితాలో ఆరవ స్థానానికి ఎగబాకారు. సోమవారం ట్రేడింగ్ సెషన్‌లో టెస్లా సీఈఓ ఎలాన్ మస్క్ సంపద 12 బిలియన్ డాలర్లు పెరగ్గా, జుకర్‌బర్గ్ అంతకుమించి లాభపడటం గమనార్హం. ప్రముఖ బ్రోకరేజ్ సంస్థ వెల్స్ ఫార్గో, మెటా షేర్ల టార్గెట్ ధరను 640 డాలర్ల నుంచి 796 డాలర్లకు పెంచడంతో ఇన్వెస్టర్లలో ఉత్సాహం పెరిగింది.

మెటా ఇటీవల ప్రారంభించిన 'మ్యూజ్' (Muse) అనే కొత్త ఏఐ ఏజెంట్‌కు వినియోగదారుల నుంచి మంచి స్పందన వస్తుండటమే ఈ సానుకూల అంచనాలకు కారణమని వెల్స్ ఫార్గో తన రిపోర్ట్‌లో పేర్కొంది. కేవలం ప్రశ్నలకు సమాధానాలు ఇవ్వడమే కాకుండా వినియోగదారుల తరఫున పనులు కూడా చేసేలా 'మ్యూజ్'ను రూపొందించారు. 

ఈమెయిల్స్ పంపడం, ప్రయాణ బుకింగ్స్ చేయడం, ఇతర యాప్‌లతో సమన్వయం చేసుకుని టాస్క్‌లు పూర్తి చేయడం వంటివి ఈ ఏఐ అసిస్టెంట్ చేయగలదు. తమ ప్లాట్‌ఫామ్‌ల ద్వారా వినియోగదారులకు 'పర్సనల్ సూపర్‌ఇంటెలిజెన్స్' అందించాలన్నదే తమ లక్ష్యమని జుకర్‌బర్గ్ గతంలోనే ప్రకటించారు.

ఈ నేపథ్యంలో సెప్టెంబర్ 23, 24 తేదీల్లో జరగనున్న 'మెటా కనెక్ట్ 2026' వార్షిక సదస్సుపై పరిశ్రమ వర్గాల్లో ఆసక్తి నెలకొంది. ఈ ఈవెంట్‌లో మెటా తమ ఏఐ ఏజెంట్లు, కొత్త సాఫ్ట్‌వేర్ ఫీచర్లు, స్మార్ట్ వేరబుల్ పరికరాల్లో సాధించిన పురోగతిని ప్రదర్శిస్తుందని అందరూ ఆసక్తిగా ఎదురుచూస్తున్నారు.