రెడ్‌మీ నుంచి కొత్త నోట్‌ 17 ప్రో సిరీస్‌ భారత్‌లోకి వచ్చింది. రెడ్‌మీ నోట్‌ 17 ప్రో, రెడ్‌మీ నోట్‌ 17 ప్రో మ్యాక్స్‌ స్మార్ట్‌ఫోన్లను కంపెనీ మంగళవారం దేశీయ మార్కెట్‌లో విడుదల చేసింది. ఇటీవల లాంచ్‌ చేసిన రెడ్‌మీ నోట్‌ 17 తర్వాత ఈ సిరీస్‌లో ఇవే కొత్త మోడల్స్‌. వీటిలో ప్రో మ్యాక్స్‌ ప్రత్యేకంగా 10,000mAh భారీ బ్యాటరీతో ఆకట్టుకుంటోంది. నోట్‌ 17 ప్రోలో 9,000mAh బ్యాటరీ ఇచ్చారు. రెండు ఫోన్లలోనూ 50 మెగాపిక్సెల్‌ ప్రధాన కెమెరాతో డ్యూయల్‌ రియర్‌ కెమెరా సెటప్‌ ఉంది.

భారత్‌లో రెడ్‌మీ నోట్‌ 17 ప్రో ధర 8జీబీ ర్యామ్‌, 128జీబీ స్టోరేజ్‌ వేరియంట్‌కు రూ.36,999గా నిర్ణయించారు. 8జీబీ + 256జీబీ మోడల్‌ ధర రూ.39,999. రెడ్‌మీ నోట్‌ 17 ప్రో మ్యాక్స్‌ ప్రారంభ ధర రూ.49,999. ఇది 8జీబీ ర్యామ్‌, 256జీబీ స్టోరేజ్‌తో వస్తుంది. 

టాప్‌ వేరియంట్‌ 12జీబీ ర్యామ్‌, 256జీబీ స్టోరేజ్‌తో ఉండగా, ధర రూ.55,999గా ఉంది. 

ఎంపిక చేసిన బ్యాంక్‌ కార్డులతో రూ.5,000 వరకు ఇన్‌స్టంట్‌ డిస్కౌంట్‌ లేదా హెచ్‌డీబీ ఫైనాన్షియల్‌ సర్వీసెస్‌ ద్వారా రూ.5,000 వరకు క్యాష్‌బ్యాక్‌ అందిస్తున్నారు. రెడ్‌మీ నోట్‌ 17 ప్రో సెప్టెంబర్‌ 17 నుంచి, ప్రో మ్యాక్స్‌ సెప్టెంబర్‌ 23 నుంచి అమెజాన్‌లో విక్రయానికి రానున్నాయి.

ప్రో మ్యాక్స్‌లో 6.83 అంగుళాల 1.5K అమోలెడ్‌ డిస్‌ప్లే, 120Hz రిఫ్రెష్‌ రేట్‌, 3,500 నిట్స్‌ పీక్‌ బ్రైట్‌నెస్‌ ఉన్నాయి. స్నాప్‌డ్రాగన్‌ 6 జెన్‌ 5 చిప్‌సెట్‌తో పనిచేస్తుంది. 12జీబీ వరకు ఎల్‌పీడీడీఆర్‌5ఎక్స్‌ ర్యామ్‌, 256జీబీ యూఎఫ్‌ఎస్‌ 4.1 స్టోరేజ్‌ లభిస్తుంది.

కెమెరాల విషయానికి వస్తే 50MP ప్రధాన కెమెరాకు ఓఐఎస్‌ సపోర్ట్‌ ఉంది. దీనికి 8MP అల్ట్రావైడ్‌ కెమెరా జత చేశారు. ముందు 32MP సెల్ఫీ కెమెరా ఇచ్చారు. 4K వీడియో రికార్డింగ్‌ కూడా చేయొచ్చు. 10,000mAh బ్యాటరీకి 100W ఫాస్ట్‌ ఛార్జింగ్‌, 27W రివర్స్‌ ఛార్జింగ్‌ సపోర్ట్‌ ఉంది. ఆండ్రాయిడ్‌ 16 ఆధారిత హైపర్‌ఓఎస్‌ 3పై ఫోన్‌ పనిచేస్తుంది. నాలుగేళ్ల ఓఎస్‌ అప్‌డేట్స్‌, ఆరేళ్ల సెక్యూరిటీ అప్‌డేట్స్‌ ఇస్తామని కంపెనీ తెలిపింది.

రెడ్‌మీ నోట్‌ 17 ప్రోలోనూ 6.83 అంగుళాల 1.5K అమోలెడ్‌ డిస్‌ప్లే, 120Hz రిఫ్రెష్‌ రేట్‌ ఉన్నాయి. అయితే ఇందులో స్నాప్‌డ్రాగన్‌ 6ఎస్‌ జెన్‌ 4 చిప్‌సెట్‌ ఇచ్చారు. గరిష్ఠంగా 2.4GHz క్లాక్‌ స్పీడ్‌తో పనిచేస్తుంది. వెనుక కెమెరా సెటప్‌ ప్రో మ్యాక్స్‌ తరహాలోనే ఉంటుంది. ముందు 16MP సెల్ఫీ కెమెరా ఇచ్చారు. 9,000mAh బ్యాటరీకి 67W ఫాస్ట్‌ ఛార్జింగ్‌, 22.5W రివర్స్‌ ఛార్జింగ్‌ సపోర్ట్‌ ఉంది.