దోమల ద్వారా వ్యాపించే డెంగీ, చికున్‌గున్యా వంటి ప్రమాదకర వ్యాధులను అరికట్టడంలో శాస్త్రవేత్తలు ఒక విప్లవాత్మక పురోగతి సాధించారు. కేవలం పురుగుమందులపై ఆధారపడకుండా, 'వోల్బాచియా' అనే ప్రత్యేక బ్యాక్టీరియా ఉన్న దోమల ద్వారా ఈ వ్యాధుల వ్యాప్తిని గణనీయంగా తగ్గించవచ్చని నిరూపించారు. బ్రెజిల్‌లో జరిపిన ఒక అధ్యయనంలో ఈ పద్ధతి ద్వారా డెంగీ, చికున్‌గున్యా సంక్రమణలు 69 శాతం తగ్గినట్లు పరిశోధకులు గుర్తించారు.

అమెరికన్ సొసైటీ ఆఫ్ ట్రాపికల్ మెడిసిన్ అండ్ హైజీన్ సమావేశంలో ఎమరీ విశ్వవిద్యాలయానికి చెందిన డాక్టర్ శ్రీ ఈడుపుగంటి ఈ వివరాలను వెల్లడించారు. బ్రెజిల్‌లోని బెలో హారిజాంటే నగరంలో నాలుగేళ్ల పాటు 5,700 మంది పాఠశాల పిల్లలపై ఈ అధ్యయనం నిర్వహించారు. వోల్బాచియా దోమలను విడుదల చేసిన ప్రాంతాల్లో పిల్లలకు డెంగీ, చికున్‌గున్యా సోకే ప్రమాదం గణనీయంగా తగ్గినట్లు వారి రక్త నమూనాల పరీక్షల్లో తేలింది. ముఖ్యంగా, 2024లో బ్రెజిల్‌ను డెంగీ మహమ్మారి అతలాకుతలం చేసిన సమయంలోనూ ఈ పద్ధతి సమర్థంగా పనిచేయడం గమనార్హం.

ఎలా పనిచేస్తుంది?
శాస్త్రవేత్తలు ప్రయోగశాలలో ఏడిస్ ఈజిప్టి దోమలలోకి 'వోల్బాచియా' అనే బ్యాక్టీరియాను ప్రవేశపెడతారు. మనుషులకు హానిచేయని ఈ బ్యాక్టీరియా, దోమలలో వైరస్‌లు వృద్ధి చెందకుండా అడ్డుకుంటుంది. ఈ బ్యాక్టీరియా ఉన్న ఆడ దోమలు వాటి సంతానానికి కూడా దీన్ని అందిస్తాయి. ఫలితంగా, కాలక్రమేణా ఆ ప్రాంతంలోని దోమల జనాభాలో వైరస్ వ్యాప్తి చేసే సామర్థ్యం తగ్గిపోతుంది. ఇండోనేషియా వంటి దేశాల్లో జరిపిన ప్రయోగాలు కూడా ఈ పద్ధతి సమర్థతను రుజువు చేశాయని శాస్త్రవేత్తలు తెలిపారు.

పురుగుమందులతో పనిలేకుండా డెంగీ వంటి వ్యాధులను జీవశాస్త్ర పద్ధతిలో నియంత్రించేందుకు ఇది ఒక ముఖ్యమైన ముందడుగు అని నిపుణులు అభిప్రాయపడుతున్నారు. ప్రపంచవ్యాప్తంగా డెంగీ భారం పెరుగుతున్న తరుణంలో ఈ ఆవిష్కరణ ఎంతో ఆశాజనకంగా కనిపిస్తోంది.