భారత క్రికెట్ జట్టు స్టార్ లెగ్ స్పిన్నర్, 2024 టీ20 ప్రపంచకప్ విజేత జట్టు సభ్యుడైన యుజ్వేంద్ర చాహల్ తన రాజకీయ ప్రస్థానాన్ని ప్రారంభించాడు. చాహల్ శనివారం భారతీయ జనతా పార్టీ (బీజేపీ)లో చేరాడు. ఈ సందర్భంగా పార్టీ అధిష్ఠానం అతడికి కీలక బాధ్యతలు అప్పగించింది. బీజేపీ ఓబీసీ మోర్చా ఢిల్లీ విభాగం కార్యవర్గంలో చాహల్‌ను 'ప్రత్యేక ఆహ్వానితుడు'గా నియమించింది.

బీజేపీలో చేరిన అనంతరం చాహల్ సోషల్ మీడియా వేదికగా ప్రధాని నరేంద్ర మోదీ సహా పలువురు బీజేపీ అగ్రనేతలకు కృతజ్ఞతలు తెలిపాడు. "బీజేపీ కుటుంబంలో నాకు చోటు, గౌరవం కల్పించినందుకు ప్రధానమంత్రి నరేంద్ర మోదీ, హోంమంత్రి అమిత్ షా, బీజేపీ జాతీయ అధ్యక్షుడు నితిన్ నబిన్, ఓబీసీ మోర్చా జాతీయ అధ్యక్షుడు అమర్‌పాల్ మౌర్యకు నా హృదయపూర్వక కృతజ్ఞతలు" అని చాహల్ తన 'ఎక్స్' ఖాతాలో పేర్కొన్నాడు.

36 ఏళ్ల చాహల్ 2016 నుంచి 2024 వరకు భారత్ తరఫున 72 వన్డేలు, 80 టీ20 మ్యాచ్‌లు ఆడాడు. వన్డేల్లో 121 వికెట్లు, టీ20ల్లో 96 వికెట్లు పడగొట్టాడు. టీ20 క్రికెట్‌లో 400 వికెట్లు తీసిన తొలి భారత బౌలర్‌గా రికార్డు సృష్టించాడు. ఐపీఎల్‌లో ముంబై ఇండియన్స్, రాయల్ ఛాలెంజర్స్ బెంగళూరు, రాజస్థాన్ రాయల్స్ తరఫున ఆడాడు. 2025 సీజన్ కోసం పంజాబ్ కింగ్స్ జట్టు చాహల్‌ను రూ.18 కోట్లకు కొనుగోలు చేసింది. చాహల్‌తో పాటు అసోం, ఒడిశా, ఉత్తరప్రదేశ్, మహారాష్ట్ర, బిహార్‌కు చెందిన పలువురు నేతలు కూడా బీజేపీ ఓబీసీ మోర్చా జాతీయ కమిటీలో వివిధ పదవుల్లో నియమితులయ్యారు.