న్యూజిలాండ్‌తో జరుగుతున్న వెలింగ్టన్ టెస్టులో భారత జట్టు బ్యాటింగ్‌లో అద్భుతాలు సృష్టిస్తోంది. టీమిండియా టెస్టు క్రికెట్ చరిత్రలోనే తొలిసారిగా, విదేశీ గడ్డపై టాప్-5 బ్యాటర్లందరూ ఒకే ఇన్నింగ్స్‌లో హాఫ్ సెంచరీలకు పైగా పరుగులు చేసి సరికొత్త చరిత్ర లిఖించారు. దక్షిణాఫ్రికా, ఇంగ్లండ్, న్యూజిలాండ్, ఆస్ట్రేలియా (ఎస్ఈఎన్ఏ) దేశాల్లో భారత బ్యాటర్లు ఈ అరుదైన ఘనత సాధించడం ఇదే తొలిసారి.

ఈ మ్యాచ్‌లో భారత బ్యాటింగ్ లైనప్ సమష్టిగా రాణించింది. కేఎల్ రాహుల్ (136) సెంచరీతో కదం తొక్కగా, కెప్టెన్ శుభ్‌మన్ గిల్ (98) శతకం అంచున వెనుదిరిగాడు. యువ ఓపెనర్ యశస్వి జైస్వాల్ (85), దేవదత్ పడిక్కల్ (80) కీలక ఇన్నింగ్స్‌లు ఆడారు. వీరితో పాటు రిషభ్ పంత్ కూడా సెంచరీతో రాణించి జట్టు స్కోరును పరుగులు పెట్టించాడు. ఫలితంగా, టీమిండియా తొలి ఐదు వికెట్ల వరకు ప్రతి వికెట్‌కు 50కి పైగా పరుగుల భాగస్వామ్యాలు నమోదు చేసింది.

ఈ అద్భుతమైన బ్యాటింగ్ ప్రదర్శనతో భారత్, న్యూజిలాండ్ గడ్డపై తమ అత్యధిక టెస్టు స్కోరు రికార్డును బద్దలు కొట్టింది. 2009లో ఇదే న్యూజిలాండ్‌పై ఒక ఇన్నింగ్స్‌లో 520 పరుగులు చేసిన టీమిండియా, ఇప్పుడు ఆ రికార్డును అధిగమించి 600 పరుగుల మార్కును దాటింది. ఆసక్తికరంగా, 17 ఏళ్ల క్రితం 520 పరుగులు చేసిన జట్టులో ఆటగాడిగా ఉన్న గౌతమ్ గంభీర్, ఇప్పుడు హెడ్ కోచ్‌గా ఉండగా ఆయన శిష్యులు ఆ రికార్డును బద్దలుకొట్టడం విశేషం.