హైదరాబాద్ శివారు మీర్‌పేట పోలీస్ స్టేషన్ పరిధిలో దారుణ ఘటన చోటుచేసుకుంది. పోష్ కాలనీలోని శ్రీ లక్ష్మీ రెసిడెన్సీ అపార్ట్‌మెంట్‌లో అనిత అనే మహిళను దుండగులు అత్యంత పాశవికంగా హత్య చేశారు. నిన్న‌ జరిగిన ఈ ఘటన స్థానికంగా కలకలం రేపింది.

వివరాల్లోకి వెళితే.. పాఠశాలకు వెళ్లిన పిల్లలు సాయంత్రం ఇంటికి తిరిగి వచ్చేసరికి, తమ తల్లి రక్తపు మడుగులో పడి ఉండటాన్ని చూసి తీవ్ర భయాందోళనకు గురయ్యారు. వెంటనే వారు మిధానిలో పనిచేసే తమ తండ్రికి సమాచారం అందించారు. ఆయన హుటాహుటిన ఇంటికి చేరుకుని, పోలీసులకు ఫిర్యాదు చేశారు.

ఘటనా స్థలానికి చేరుకున్న పోలీసులు, అనిత తలపై బలమైన గాయం ఉన్నట్లు గుర్తించారు. ఆమె మెడలోని బంగారు గొలుసు, చేతికి ఉన్న రెండు గాజులు కనిపించకుండా పోయాయి. ఇంట్లోకి బలవంతంగా ప్రవేశించిన ఆనవాళ్లు లేకపోవడంతో బాధితురాలికి తెలిసిన వ్యక్తులే ఈ ఘాతుకానికి పాల్పడి ఉండవచ్చని పోలీసులు అనుమానిస్తున్నారు.

క్లూస్ టీమ్, డాగ్ స్క్వాడ్‌తో కలిసి పోలీసులు ఫ్లాట్‌లో ఆధారాలు సేకరించారు. నిందితులను గుర్తించేందుకు అపార్ట్‌మెంట్ సమీపంలోని సీసీటీవీ ఫుటేజ్‌ను స్వాధీనం చేసుకుని పరిశీలిస్తున్నారు. ఈ ఘటనపై కేసు నమోదు చేసుకున్న మీర్‌పేట పోలీసులు దర్యాప్తు ముమ్మరం చేశారు.