‘లిటిల్ హార్ట్స్’ ఫేమ్ మౌళి కొత్త మూవీ.. నవ్వించే 'దొంగ నా కొడుకు'.. అంచనాలు పెంచిన ట్రైలర్!

'లిటిల్ హార్ట్స్' చిత్రంతో యువతలో మంచి క్రేజ్ సంపాదించుకున్న నటుడు మౌళి, ఇప్పుడు 'దొంగ నా కొడుకు' (డీఎన్‌కే) అనే సినిమాతో ప్రేక్షకులను పలకరించేందుకు సిద్ధమయ్యాడు. ప్రముఖ నిర్మాణ సంస్థ మైత్రీ మూవీ మేకర్స్ నిర్మిస్తున్న ఈ క్రైమ్ కామెడీ చిత్రానికి శ్రీను కంబాల దర్శకత్వం వహిస్తున్నారు. తాజాగా ఈ సినిమా థియేట్రికల్ ట్రైలర్‌ను విడుదల చేయగా, ఇది ప్రేక్షకుల్లో భారీ అంచనాలను నెలకొల్పింది.

ట్రైలర్‌ను బట్టి చూస్తే, క్రికెట్ బెట్టింగ్‌లకు అలవాటు పడి, తల్లిదండ్రుల డబ్బులు పోగొట్టే బాధ్యత లేని యువకుడిగా మౌళి కనిపించనున్నాడు. డబ్బు కోసం హీరోయిన్ సుస్మితా శెట్టిని ఇబ్బంది పెట్టడం, ఆమె ఇచ్చిన బంగారు రింగ్స్‌ను సైతం తాకట్టు పెట్టే సన్నివేశాలు ఆద్యంతం నవ్వులు పూయిస్తున్నాయి. 

అప్పులు తీర్చడానికి, తేలికగా డబ్బు సంపాదించడానికి ఓ జ్యువెల్లరీ షాప్‌లో దొంగతనం చేయాలని ప్లాన్ చేస్తాడు. ఆ ప్లాన్ ఎలాంటి గందరగోళానికి దారితీసిందనే అంశం చుట్టూ కథనం సాగనున్నట్లు తెలుస్తోంది.

మాస్ అండ్ చిల్లర్ ఎంటర్‌టైనర్‌గా వస్తున్న ఈ చిత్రంలో అలీ, రఘుబాబు, సుదర్శన్, రాజిత వంటి నటులు కీలక పాత్రల్లో అలరించనున్నారు. ఈ సినిమా ఈ నెల‌ 13న ప్రపంచవ్యాప్తంగా థియేటర్లలో గ్రాండ్‌గా విడుదల కానుంది.