అమెరికాలో హెచ్‌-1బీ వీసాపై ఉన్న ఓ ప్రవాస భారతీయుడు కోటీశ్వరుడిగా మారి అందరి దృష్టిని ఆకర్షిస్తున్నాడు. డిజిటల్ కంటెంట్ క్రియేటర్ అయిన ప్రితేష్ జగానీ, తాను ఈ మైలురాయిని ఎలా చేరుకున్నాడో వివరిస్తూ తన ప్రయాణాన్ని ఇన్‌స్టాగ్రామ్‌లో పంచుకున్నారు. 

ఇది ఏదో రాత్రికి రాత్రే వచ్చిన అదృష్టం కాదని, ఆదాయాన్ని పెంచుకుంటూ, ఖర్చులను నియంత్రించుకుంటూ, ఒక పద్ధతి ప్రకారం ముందుకు సాగడం వల్లే సాధ్యమైందని ఆయన స్పష్టం చేశారు. ఈ పోస్ట్ ప్రస్తుతం సోషల్ మీడియాలో వైరల్‌గా మారింది.

"హెచ్‌-1బీ వీసాపై కోటీశ్వరుడిగా మారడం అనేది ఏదో ఒక్క అదృష్ట పెట్టుబడితో సాధ్యం కాలేదు. పటిష్ఠ‌మైన ఆర్థిక పునాది, ఖర్చుల నియంత్రణ, అప్పులు తీర్చడం, పన్ను ప్రయోజనాలున్న ఖాతాలను ఉపయోగించుకోవడం, నిరంతరం పెట్టుబడులు పెట్టడం వల్లే ఇది సాధ్యమైంది" అని జగానీ వివరించారు. 

అమెరికా వెళ్లిన తొలినాళ్లలో తన లక్ష్యం కేవలం మనుగడ సాగించడమేనని ఆయన తెలిపారు. దీనికోసం ఒక సాధారణ బడ్జెట్, మూడు నుంచి ఆరు నెలలకు సరిపడా అత్యవసర నిధిని ఏర్పాటు చేసుకున్నానని, రోజువారీ ఆర్థిక వ్యవహారాలను అదుపులో ఉంచుకోవడంపైనే దృష్టి సారించానని పేర్కొన్నారు.

అమెరికాలోని ఆర్థిక వ్యవస్థలను అర్థం చేసుకోవడంపై దృష్టి పెట్టినట్లు జగానీ చెప్పారు. "క్రెడిట్ స్కోర్ పెంచుకోవడం, ఆరోగ్య బీమా గురించి తెలుసుకోవడం, ఇంటికి డబ్బు పంపడం వంటివి నిర్వహించాను. జీతం పెరిగినప్పుడు, అనవసరంగా జీవనశైలిని మార్చుకోలేదు (లైఫ్‌స్టైల్ ఇన్‌ఫ్లేషన్). విద్యా రుణం పూర్తిగా చెల్లించి, 401(k) వంటి రిటైర్మెంట్ పథకాలలో పెట్టుబడులు పెట్టడం ప్రారంభించాను" అని అన్నారు. సంపద పెరిగినప్పటికీ, అనవసర ఖర్చులకు దూరంగా ఉంటూ ఆ మిగిలిన డబ్బును పెట్టుబడులకు మళ్లించినట్లు తెలిపారు.

ఖర్చులను తగ్గించుకోవడం కన్నా.. కొత్త నైపుణ్యాలు నేర్చుకోవడం (అప్‌స్కిల్లింగ్), వ్యూహాత్మకంగా ఉద్యోగాలు మారడం తన సంపద పెరుగుదలపై ఎక్కువ ప్రభావం చూపాయని జగానీ స్పష్టం చేశారు. 

"అమెరికాలో హెచ్‌-1బీ వీసాపై ఉంటూ సంపద సృష్టించాలనుకునే వారు రెండు విషయాలపై దృష్టి పెట్టాలి. ఒకటి, ఉద్దేశపూర్వకంగా ఖర్చు చేయడం. రెండు, సంపాదన శక్తిని నిరంతరం పెంచుకోవడం. ఈ మార్గంలోనే దీర్ఘకాలిక సంపదను నిర్మించుకోవచ్చు" అని ఆయన సూచించారు.