వారానికి రెండు గంటలు ఇది చేస్తే చాలు.. మహిళల్లో గుండె జబ్బుల ముప్పు తగ్గుతుంది!

జిమ్‌కు వెళ్లడం అంటే కండలు పెంచుకోవడమే అనుకుంటున్నారా? అయితే ఆ ఆలోచన మార్చుకోవాల్సిన సమయం వచ్చింది. వారానికి కేవలం రెండు గంటల స్ట్రెంగ్త్ ట్రైనింగ్‌తో మహిళల్లో గుండె జబ్బుల ముప్పు గణనీయంగా తగ్గొచ్చని తాజా అధ్యయనం చెబుతోంది. రోజువారీ జీవితంలో చిన్న మార్పే.. దీర్ఘకాల ఆరోగ్యానికి పెద్ద పెట్టుబడిగా మారుతుందని వైద్య నిపుణులు సూచిస్తున్నారు.

ఏం తేలింది?
హార్వర్డ్ టీ.హెచ్. చాన్ స్కూల్ ఆఫ్ పబ్లిక్ హెల్త్‌కు చెందిన పరిశోధకులు 1.17 లక్షల మందికి పైగా మహిళల ఆరోగ్య వివరాలను విశ్లేషించారు. వారి వ్యాయామ అలవాట్లు, రోజువారీ శారీరక శ్రమ, ఎక్కువసేపు కూర్చునే అలవాట్లను ఎన్నో సంవత్సరాల పాటు పరిశీలించారు. వారానికి కనీసం రెండు గంటలు స్ట్రెంగ్త్ ట్రైనింగ్ చేసిన మహిళల్లో గుండె సంబంధిత వ్యాధుల ప్రమాదం 20 శాతం తగ్గినట్లు గుర్తించారు. ముఖ్యంగా గుండెపోటు వచ్చే అవకాశం గణనీయంగా తగ్గిందని అధ్యయనం వెల్లడించింది.

గుండెకు మేలు
స్ట్రెంగ్త్ ట్రైనింగ్ కేవలం కండరాల బలాన్నే పెంచదు. శరీరంలోని కొవ్వును తగ్గించడంలో, బరువును నియంత్రించడంలో కూడా తోడ్పడుతుంది. రక్తపోటు, కొలెస్ట్రాల్, రక్తంలో చక్కెర స్థాయులను అదుపులో ఉంచేందుకు ఉపయోగపడుతుంది. ఇవన్నీ గుండె జబ్బులకు ప్రధాన కారణాలు కావడంతో వాటిని తగ్గించడం ద్వారా గుండె ఆరోగ్యానికి మేలు జరుగుతుందని వైద్య నిపుణులు చెబుతున్నారు.

ఏరోబిక్‌ వ్యాయామాలతో కలిపి
స్ట్రెంగ్త్ ట్రైనింగ్‌తో పాటు వేగంగా నడవడం, సైక్లింగ్ లేదా ఈత వంటి ఏరోబిక్ వ్యాయామాలు చేస్తే మరింత ప్రయోజనం ఉంటుందని అధ్యయనం వెల్లడించింది. వారానికి రెండు గంటల స్ట్రెంగ్త్ ట్రైనింగ్‌తో పాటు 150 నిమిషాల మోస్తరు ఏరోబిక్ వ్యాయామం చేసిన మహిళల్లో గుండెపోటు ప్రమాదం 45 శాతం వరకు తగ్గినట్లు గుర్తించారు. రెండు రకాల వ్యాయామాలు ఒకదానికొకటి తోడ్పడతాయని పరిశోధకులు పేర్కొన్నారు.

చురుకుదనం ముఖ్యం
వ్యాయామం చేసినంత మాత్రాన సరిపోదని పరిశోధన చెబుతోంది. మిగతా సమయాల్లో కూడా శారీరకంగా చురుగ్గా ఉండడం అవసరమని సూచించింది. ఎక్కువసేపు కూర్చోవడం, ముఖ్యంగా గంటల తరబడి టీవీ చూడడం వంటి అలవాట్లు గుండె ఆరోగ్యంపై ప్రతికూల ప్రభావం చూపుతాయని తెలిపింది. రోజంతా చురుకైన జీవనశైలిని అలవాటు చేసుకుంటే గుండె సంబంధిత వ్యాధుల ముప్పును మరింత తగ్గించుకోవచ్చని వైద్య నిపుణులు సూచిస్తున్నారు.