ప్రముఖ పౌల్ట్రీ, అగ్రి బిజినెస్ సంస్థ స్నేహ గ్రూప్‌పై ఆదాయపు పన్ను (ఐటీ) శాఖ అధికారులు శనివారం ఉదయం మెరుపు దాడులు చేపట్టారు. తెలంగాణ, ఆంధ్రప్రదేశ్‌ వ్యాప్తంగా మొత్తం 16 ప్రాంతాల్లో ఏకకాలంలో ఈ సోదాలు కొనసాగుతున్నాయి. హైదరాబాద్, విజయవాడ నగరాల్లోని ప్రధాన కార్యాలయాలతో పాటు డైరెక్టర్ల నివాసాల్లోనూ అధికారులు విస్తృతంగా తనిఖీలు నిర్వహిస్తున్నారు. కొండాపూర్ కేంద్రంగా కార్యకలాపాలు సాగిస్తున్న ఈ సంస్థ కీలక రికార్డులను అధికారులు పరిశీలిస్తున్నారు.

సంస్థ డైరెక్టర్లు రామ్‌రెడ్డి డెండి, వరుణ్ రెడ్డి డెండి, స్నేహ డెండిల ఇళ్లలోనూ ఐటీ బృందాలు ఏకకాలంలో తనిఖీలు చేపట్టాయి. 1982లో రామ్‌రెడ్డి చికెన్ మార్కెట్‌గా ప్రారంభమైన ఈ వ్యాపారం, 1994 నాటికి స్నేహ ఫామ్స్‌గా విస్తరించింది. ప్రస్తుతం పౌల్ట్రీ బ్రీడింగ్, చికెన్ ప్రాసెసింగ్, పశువుల దాణా రంగాలతో పాటు 'సఫల' బ్రాండ్‌తో వంట నూనెల తయారీ విభాగంలోనూ ఈ సంస్థ వ్యాపార కార్యకలాపాలు నిర్వహిస్తోంది.

తెలంగాణలో గంటకు దాదాపు 12,000 కోళ్లను ప్రాసెస్ చేసే భారీ సామర్థ్యం కలిగిన అధునాతన ఆటోమేటెడ్ ప్లాంట్‌ను స్నేహ గ్రూప్ నడుపుతోంది. రెండు తెలుగు రాష్ట్రాల్లో రెండు వేల మందికి పైగా కాంట్రాక్ట్ రైతులతో కలిసి ఈ సంస్థ అనుసంధానమై పనిచేస్తోంది. పన్ను చెల్లింపుల్లో ఏవైనా అవకతవకలు జరిగాయా అన్న కోణంలో అధికారులు రికార్డులు, హార్డ్‌డిస్క్‌లు, బ్యాంకు ఖాతాల వివరాలను క్షుణ్ణంగా పరిశీలిస్తున్నట్లు సమాచారం.