భారత క్రికెట్ దిగ్గజం, మాజీ కెప్టెన్ మహేంద్ర సింగ్ ధోనీ ఐపీఎల్ రిటైర్మెంట్ నిర్ణయంపై బీసీసీఐ ఉపాధ్యక్షుడు రాజీవ్ శుక్లా స్పందించారు. ధోనీ అత్యంత నిజాయతీపరుడని, ఆటకు 100 శాతం న్యాయం చేయలేనని భావిస్తే తక్షణమే స్వయంగా తప్పుకుంటాడని ప్రశంసించారు. ధోనీ తీసుకున్న నిర్ణయాన్ని ప్రతి ఒక్కరూ గౌరవించాలని ఆయన కోరారు.

గురువారం ఏఎన్ఐ వార్తా సంస్థతో మాట్లాడుతూ శుక్లా ఈ వ్యాఖ్యలు చేశారు. "ధోనీ రిటైర్మెంట్ ఆయన వ్యక్తిగత నిర్ణయం. ఆట పట్ల ఆయన చాలా నిజాయితీగా ఉంటాడు. 99 శాతం ఇవ్వగలనని, ఒక్క శాతం లోటు వచ్చినా మైదానం నుంచి తప్పుకుంటాడు. కేవలం 100 శాతం ఇవ్వగలను అనుకున్నప్పుడే ఆడతాడు. అందుకే, బాగా ఆలోచించే ఈ నిర్ణయం తీసుకున్నాడు. క్రికెట్‌కు అత‌డు చేసిన సేవ ఎనలేనిది. అలాంటి వ్యక్తి నిర్ణయాన్ని మనం గౌరవించాలి" అని శుక్లా పేర్కొన్నారు.

2007లో ధోనీని కెప్టెన్‌గా నియమించినప్పుడు చాలా మందికి నమ్మకం లేదని, కానీ కఠిన పరిస్థితుల్లో మ్యాచ్‌లు గెలిపించి తనను తాను నిరూపించుకున్నాడని శుక్లా గుర్తుచేశారు. 2006లో పాకిస్థాన్ పర్యటనను కూడా ఆయన ప్రస్తావించారు. "అప్పటి పాక్ అధ్యక్షుడు పర్వేజ్ ముషారఫ్ సైతం ధోనీ ఆటతీరుకు ముగ్ధుడై, జుట్టు కత్తిరించుకోవద్దని సూచించారు. తన ప్రదర్శనతోనే ధోనీ అంతటి ప్రజాదరణ పొందాడు" అని అన్నారు.

చెన్నై సూపర్ కింగ్స్‌కు ధోనీ చేసిన సేవలను కూడా శుక్లా కొనియాడారు. "తమిళనాడులో అత‌డిని అభిమానులు 'థలా' అని పిలుస్తారు. కానీ, నా ఉద్దేశంలో కశ్మీర్ నుంచి కన్యాకుమారి వరకు అత‌నికి ఆదరణ ఉంది. ఇకపై మెంటార్‌గా చెన్నై జట్టుకు అత‌డి అనుభవం ఎంతగానో ఉపయోగపడుతుంది" అని వివరించారు. 

19 ఏళ్ల సుదీర్ఘ ఐపీఎల్ కెరీర్‌కు ధోనీ వీడ్కోలు పలికిన విష‌యం తెలిసిందే. అత‌ని నాయకత్వంలో చెన్నై సూపర్ కింగ్స్ ఐదుసార్లు (2010, 2011, 2018, 2021, 2023) ఐపీఎల్ ఛాంపియన్‌గా నిలిచి, ముంబై ఇండియన్స్ రికార్డును సమం చేసింది. 2025లో తన చివరి ఐపీఎల్ మ్యాచ్ ఆడిన ధోనీ, 2027 సీజన్ నుంచి చెన్నై జట్టుకు మెంటార్‌గా వ్యవహరించనున్నాడు. జహీర్ ఖాన్ కొత్త హెడ్ కోచ్‌గా బాధ్యతలు చేపట్టిన తరుణంలో జట్టు పునర్నిర్మాణంలో ధోనీ అనుభవం కీలకం కానుంది.