రాష్ట్రంలో రాబోయే గ్రామ పంచాయతీ ఎన్నికల్లోనూ కూటమి బలపరిచిన అభ్యర్థులదే విజయమని తెలుగుదేశం పార్టీ రాష్ట్ర అధ్యక్షుడు పల్లా శ్రీనివాసరావు ధీమా వ్యక్తం చేశారు. బుధవారం మంగళగిరిలోని టీడీపీ కేంద్ర కార్యాలయంలో కూటమి పార్టీల ఉమ్మడి మీడియా సమావేశం జరిగింది. ఈ సమావేశంలో పల్లా శ్రీనివాసరావుతో పాటు మంత్రి, జనసేన పార్టీ పొలిటికల్ అఫైర్స్ కమిటీ (పీఏసీ) ఛైర్మన్ నాదెండ్ల మనోహర్, బీజేపీ రాష్ట్ర అధ్యక్షుడు పీవీఎన్ మాధవ్ పాల్గొన్నారు.

ఈ సందర్భంగా పల్లా శ్రీనివాసరావు మాట్లాడుతూ, ఎన్నికలు ఈవీఎంల ద్వారా జరిగినా లేదా బ్యాలెట్ పేపర్ పద్ధతిలో జరిగినా ప్రజల మద్దతు ఎల్లప్పుడూ కూటమి వైపే ఉంటుందని పేర్కొన్నారు. ఇటీవల జరిగిన స్థానిక సంస్థల ఎన్నికల్లో కార్పొరేషన్లు, మున్సిపాలిటీలు, నగర పంచాయతీలు, జెడ్పీటీసీ, ఎంపీటీసీ స్థానాల్లో ప్రజలు కూటమికి స్పష్టమైన తీర్పు ఇచ్చారని గుర్తుచేశారు. ఈ ఫలితాలు కూటమి ప్రభుత్వంపై ప్రజలకు ఉన్న బలమైన నమ్మకాన్ని పునరుద్ఘాటించాయని, అదే విజయ స్ఫూర్తిని రాబోయే గ్రామ పంచాయతీ ఎన్నికల్లోనూ కొనసాగించాలని ప్రజలను కోరారు.

ప్రస్తుతం రాష్ట్రంలో కేంద్రం, రాష్ట్ర ప్రభుత్వాల భాగస్వామ్యంతో డబుల్ ఇంజిన్ పాలన సాగుతోందని, స్థానిక సంస్థల్లోనూ కూటమికి విజయం చేకూర్చితే ‘ట్రిపుల్ ఇంజిన్ సర్కార్’ ఏర్పాటవుతుందని ఆయన తెలిపారు. దీని ద్వారా అభివృద్ధి, సంక్షేమ ఫలాలు గ్రామస్థాయి వరకు వేగంగా, సమర్థవంతంగా చేరువవుతాయని వివరించారు. 

కూటమి అధికారంలోకి వచ్చిన నాటి నుంచి ప్రజల ఆకాంక్షలకు అనుగుణంగా పరిపాలన సాగిస్తోందని, బీసీలకు 34 శాతం రిజర్వేషన్లు కల్పించడం ద్వారా సామాజిక న్యాయాన్ని చేతల్లో చూపించామని చెప్పారు. ప్రకృతి వైపరీత్యాలు, నీటి ఎద్దడి వంటి అనేక ప్రతికూల పరిస్థితులను సమర్థంగా ఎదుర్కొంటూ అభివృద్ధి దిశగా అడుగులు వేస్తున్నామని తెలిపారు.

గత వైసీపీ పాలనలో ఎన్నికల ప్రక్రియ స్వేచ్ఛగా సాగలేదని ఆయన ఆరోపించారు. పులివెందుల వంటి ప్రాంతాల్లో సైతం దశాబ్దాల తర్వాత ప్రజలు నిర్భయంగా ఓటు హక్కు వినియోగించుకుని ప్రజాస్వామ్యానికి పట్టం కట్టారని పల్లా శ్రీనివాసరావు పేర్కొన్నారు.

రాబోయే పంచాయతీ ఎన్నికల వ్యూహంపై మాట్లాడుతూ, సర్పంచ్ ఎన్నికల్లో అధికారికంగా పార్టీ గుర్తులు ఉండవని, అందువల్ల టీడీపీ, జనసేన, బీజేపీ పార్టీలు పూర్తి సమన్వయంతో పనిచేయాలని పిలుపునిచ్చారు. గ్రామ, మండల స్థాయిలో విస్తృతంగా చర్చలు జరిపి, ప్రజాదరణ మరియు సమర్థత కలిగిన అభ్యర్థులను బరిలోకి దించుతామన్నారు. ఎక్కడా రెబల్ అభ్యర్థులు లేకుండా చూసుకోవడం ద్వారా వంద శాతం ఫలితాలు సాధించడమే తమ లక్ష్యమని స్పష్టం చేశారు. నాయకులు, కార్యకర్తలు వ్యక్తిగత అభిప్రాయాల కంటే కూటమి ఐక్యతను, విజయ భావనను దృష్టిలో ఉంచుకుని పనిచేయాలని సూచించారు.
20261118frfe044b0f8b28.jpg