స్థానిక సంస్థల ఎన్నికల సందర్భంగా బ్యాలెట్ బాక్సుల అపహరణకు యత్నించారనే ఆరోపణలతో అరెస్టయిన వైసీపీ ఎమ్మెల్సీ లేళ్ల అప్పిరెడ్డిని రాజమండ్రి కేంద్ర కారాగారానికి తరలించారు. గుంటూరు జిల్లా జైలులో రిమాండ్ ఖైదీగా ఉన్న ఆయనను స్థానిక న్యాయస్థానం ఆదేశాల మేరకు భారీ పోలీసు బందోబస్తు నడుమ ప్రత్యేక వాహనంలో రాజమండ్రికి తరలించారు.

అప్పిరెడ్డిని వేరే జైలుకు మార్చాలని కోరుతూ గుంటూరు జైలు సూపరింటెండెంట్ స్థానిక కోర్టులో పిటిషన్ దాఖలు చేశారు. ఈ సందర్భంగా జైలు అధికారులు, పోలీసులు న్యాయస్థానానికి ప్రత్యేక నివేదికలు సమర్పించారు. "అప్పిరెడ్డి కోరిన ప్రత్యేక సదుపాయాలు గుంటూరు జిల్లా జైలులో అందుబాటులో లేవు. జైలు వద్ద భద్రతాపరమైన సమస్యలు తలెత్తుతున్నాయి" అని ఆ నివేదికల్లో అధికారులు స్పష్టం చేశారు. అలాగే రాజకీయ నాయకులు, కార్యకర్తలు పెద్ద సంఖ్యలో జైలు వద్దకు వస్తుండటంతో శాంతిభద్రతల సమస్యలు, పరిపాలనాపరమైన ఇబ్బందులు తలెత్తుతున్నాయని కోర్టు దృష్టికి తీసుకెళ్లారు.

పోలీసులు, జైలు అధికారుల నివేదికలను పరిశీలించిన గుంటూరు న్యాయస్థానం... అప్పిరెడ్డిని రాజమండ్రి సెంట్రల్ జైలుకు తరలించేందుకు అనుమతినిస్తూ ఆదేశాలు జారీ చేసింది. కోర్టు ఉత్తర్వులు వెలువడిన వెంటనే అధికారులు ఏర్పాట్లు పూర్తి చేసి, పటిష్ఠ భద్రతా ఏర్పాట్ల మధ్య ఆయన్ను రాజమండ్రి కేంద్ర కారాగారానికి తరలించి అక్కడి అధికారులకు అప్పగించారు.