టాలీవుడ్ లెజెండరీ నటుడు, 'సూపర్ స్టార్' కృష్ణ వర్ధంతి సందర్భంగా ఆయన తనయుడు, స్టార్ హీరో మహేశ్ బాబు తండ్రిని గుర్తుచేసుకుంటూ తీవ్ర భావోద్వేగానికి లోనయ్యారు. ఆదివారం కృష్ణ 4వ వర్ధంతిని పురస్కరించుకుని ఆయన స్మృతికి ఘనంగా నివాళులర్పించారు.

మహేశ్ బాబు తన అధికారిక ఇన్‌స్టాగ్రామ్ ఖాతాలో చిన్ననాటి ఒక అరుదైన బ్లాక్ అండ్ వైట్ ఫొటోను పంచుకున్నారు. ఆ చిత్రంలో చిన్నారి మహేశ్‌ను కృష్ణ ఎంతో ఆప్యాయంగా చేతుల్లోకి తీసుకుని కనిపిస్తున్నారు. ఈ ఫొటోకు "ఎప్పటికీ నా సూపర్‌స్టారే (Always my Superstar…)" అని క్యాప్షన్ జోడించి, హార్ట్ ఎమోజీని జత చేశారు.

మహేశ్ పెట్టిన ఈ పోస్ట్‌పై ఆయన అర్ధాంగి నమ్రతా శిరోద్కర్ స్పందిస్తూ హార్ట్ ఎమోజీలను కామెంట్‌గా పెట్టారు. అలాగే ఆమె తన ఇన్‌స్టాగ్రామ్ స్టోరీస్‌లోనూ దివంగత కృష్ణను స్మరించుకున్నారు. "ప్రేమ, గౌరవం, ఎంతో ఆప్యాయతతో కూడిన జీవితాన్ని గుర్తుచేసుకుంటున్నాను.. మిమ్మల్ని ఎప్పటికీ మిస్ అవుతూనే ఉంటాం" అంటూ ఆమె రాసుకొచ్చారు.

తెలుగు సినీ పరిశ్రమలో నటుడిగా, దర్శకుడిగా, నిర్మాతగా తనదైన శకానికి నాంది పలికిన కృష్ణ 2022 నవంబర్ 15న 79 ఏళ్ల వయసులో తుదిశ్వాస విడిచారు. 'గూఢచారి 116', 'అల్లూరి సీతారామరాజు', 'మోసగాళ్లకు మోసగాడు', 'పండంటి కాపురం', 'దేవుడు చేసిన మనుషులు', 'ఏజెంట్ గోపి', 'సింహాసనం' వంటి ఎన్నో చారిత్రాత్మక చిత్రాలతో ఆయన తెలుగు సినిమా చరిత్రలో ప్రత్యేక స్థానాన్ని సొంతం చేసుకున్నారు.

కృష్ణ మరణించిన సమయంలో కూడా మహేశ్ బాబు తన తండ్రి గురించి అత్యంత భావోద్వేగంగా రాసుకొచ్చిన సంగతి తెలిసిందే. "మీ జీవితం ఒక వేడుకలా సాగింది.. మీ నిష్క్రమణ కూడా అంతే గొప్పగా నిలిచింది. ధైర్యానికి నిలువెత్తు రూపం మీరు. నా స్ఫూర్తి, నా ధైర్యం మీరే. మీ వెలుగు నాలో ఎప్పటికీ ప్రకాశిస్తూనే ఉంటుంది. మీ లెగసీని ముందుకు తీసుకెళతాను" అని మహేశ్ అప్పట్లో పేర్కొన్నారు. గత ఏడాది కూడా తండ్రితో కలిసి షూటింగ్ సెట్‌లో దిగిన ఫొటోను షేర్ చేస్తూ కృష్ణ జ్ఞాపకాలను తలచుకున్నారు.

సినిమాల విషయానికి వస్తే, మహేశ్ బాబు ప్రస్తుతం ప్రముఖ దర్శకుడు ఎస్ఎస్ రాజమౌళి దర్శకత్వంలో రాబోతున్న భారీ గ్లోబ్‌ట్రాటర్ చిత్రం 'వారణాసి' ప్రాజెక్ట్‌తో బిజీగా ఉన్నారు. ఈ సినిమాలో ప్రియాంక చోప్రా, పృథ్వీరాజ్ సుకుమారన్ ప్రధాన పాత్రల్లో నటిస్తున్నారు.