సంగీత ప్రియులకు మరో అద్భుతమైన అవకాశం రానుంది. ఆస్కార్‌, గ్రామీ అవార్డుల విజేత, ప్రముఖ సంగీత దర్శకుడు ఏఆర్‌ రెహమాన్‌ హైదరాబాద్‌లో సంగీత కచ్చేరీ ఇవ్వనున్నారు. తన ‘వండర్‌మెంట్‌ టూర్‌’లో భాగంగా 2027 జనవరి 31న గచ్చిబౌలి స్టేడియంలో ఈ కార్యక్రమం జరగనుంది. నోయిజ్‌ ఎంటర్‌టైన్‌మెంట్‌ నిర్వహిస్తున్న ఈ షోలో లైవ్‌ ఆర్కెస్ట్రాతో పాటు ప్రత్యేక ప్రదర్శన ప్రేక్షకులను అలరించనుంది.

సాయంత్రం 7 గంటలకు ప్రారంభమయ్యే ఈ ప్రదర్శన దాదాపు మూడు గంటల పాటు కొనసాగనుంది. హిందీ, తెలుగు, తమిళ భాషల్లో రెహమాన్‌ స్వరపరిచిన పాటలను వినిపించనున్నారు. ఐదేళ్లకు పైబడిన వారికి ఈ కార్యక్రమంలోకి ప్రవేశం కల్పించనున్నారు. హైదరాబాద్‌తో పాటు చుట్టుపక్కల ప్రాంతాల నుంచి కూడా పెద్ద సంఖ్యలో అభిమానులు తరలివచ్చే అవకాశం ఉంది.

‘రోజా’, ‘దిల్‌ సే’, ‘రంగ్‌ దే బసంతి’, ‘జోధా అక్బర్‌’, ‘పొన్నియిన్‌ సెల్వన్‌’ వంటి చిత్రాలకు రెహమాన్‌ అందించిన సంగీతం విశేష ఆదరణ పొందింది. ‘స్లమ్‌డాగ్‌ మిలియనీర్‌’ చిత్రానికి రెండు ఆస్కార్‌ అవార్డులు అందుకున్న ఆయన.. పలు గ్రామీ పురస్కారాలనూ గెలుచుకున్నారు. భాషలకతీతంగా అభిమానులను సంపాదించుకున్న ఆయన పాటలను ప్రత్యక్షంగా వినే అవకాశం కోసం సంగీత ప్రియులు ఎదురుచూస్తున్నారు.

ఈ కార్యక్రమానికి టికెట్‌ ధరలు రూ.2,249 నుంచి ప్రారంభమవుతాయి. బుక్‌మైషో ద్వారా టికెట్లు అందుబాటులో ఉన్నాయి.