నవ్విస్తూనే ఆలోచింపజేసేలా.. ‘ఇడుపు కాయితం’ టీజర్ చూశారా?

విలక్షణ నటుడు ప్రియదర్శి, నూతన నటి నాగదుర్గ జంటగా నటిస్తున్న చిత్రం ‘ఇడుపు కాయితం’. ప్రముఖ నిర్మాణ సంస్థలు సుకుమార్ రైటింగ్స్, బన్నీ వాస్ వర్క్స్ సంయుక్తంగా నిర్మిస్తున్న ఈ సినిమా టీజర్‌ను తాజాగా విడుదల చేశారు. తెలంగాణ గ్రామీణ నేపథ్యంలో సాగే ఈ సరదా కుటుంబ కథా చిత్రంపై టీజర్ అంచనాలను పెంచుతోంది.

ప్రముఖ ఆధ్యాత్మిక ప్రవచనకర్త చాగంటి కోటేశ్వరరావు గారి మాటలతో ప్రారంభమైన ఈ టీజర్, శ్రీను (ప్రియదర్శి), శ్రీలత (నాగదుర్గ) పాత్రల మధ్య ప్రేమ, పెళ్లి ప్రస్తావన, వివాహ వేడుకలు, కుటుంబ సభ్యుల మధ్య జరిగే హాస్యభరిత సన్నివేశాలతో సరదాగా సాగింది. అయితే, తెలంగాణ మాండలికంలో ‘ఇడుపు కాయితం’ అంటే విడాకుల పత్రం అని అర్థం. పెళ్లి బంధంతో మొదలైన కథ, విడాకుల వరకు ఎందుకు వెళ్లిందనే ఆసక్తిని రేకెత్తించేలా టీజర్‌ను తీర్చిదిద్దారు. సంతోషంగా సాగిపోతున్న వీరి జీవితంలో ఎలాంటి సవాళ్లు ఎదురయ్యాయనేది కథలో కీలక అంశంగా కనిపిస్తోంది.

తెలంగాణ జానపద సంగీతం, నృత్యంతో ఎంతో ప్రాచుర్యం పొందిన నాగదుర్గ ఈ సినిమాతో కథానాయికగా వెండితెరకు పరిచయం అవుతుండటం విశేషం. వంశీ రెడ్డి దొండపాటి ఈ చిత్రానికి దర్శకత్వం వహిస్తున్నారు. సురేశ్ బొబ్బిలి అందించిన సంగీతం ఇప్పటికే ప్రేక్షకులను ఆకట్టుకుంది. సినిమా నుంచి విడుదలైన ‘శ్రీలత’, ‘గడప’ పాటలతో పాటు దీపావళికి రిలీజ్ చేసిన ఎనర్జిటిక్ ‘బరాత్ బీట్’ పాటకు కూడా మంచి స్పందన లభించింది.

అన్ని కార్యక్రమాలు పూర్తి చేసి, ఈ ఫ్యామిలీ ఎంటర్‌టైనర్‌ను డిసెంబర్ 11న ప్రపంచవ్యాప్తంగా థియేటర్లలో విడుదల చేసేందుకు నిర్మాతలు సన్నాహాలు చేస్తున్నారు. సుకుమార్, బన్నీ వాస్ వంటి అగ్ర నిర్మాతలు అందిస్తున్న సినిమా కావడంతో ‘ఇడుపు కాయితం’పై సినీ వర్గాల్లో మంచి అంచనాలు నెలకొన్నాయి.