హైదరాబాద్‌లోని రాజీవ్ గాంధీ అంతర్జాతీయ విమానాశ్రయం మరో కీలక మైలురాయిని చేరుకుంది. ఎయిర్‌పోర్టులోని ప్రధాన రన్‌వే 09Rను అత్యంత అధునాతన క్యాట్-III ఆపరేషన్లకు అనుగుణంగా విజయవంతంగా అప్‌గ్రేడ్ చేసినట్లు జీఎంఆర్ హైదరాబాద్ ఇంటర్నేషనల్ ఎయిర్‌పోర్ట్ లిమిటెడ్ అధికారికంగా ప్రకటించింది. ఈ ఆధునికీకరణ ద్వారా ప్రతికూల వాతావరణ పరిస్థితుల్లోనూ విమానాల రాకపోకలను నిరంతరాయంగా కొనసాగించే వెసులుబాటు లభించింది.

ముఖ్యంగా శీతాకాలంలో ఎదురయ్యే దట్టమైన పొగమంచు, వర్షాలు లేదా అత్యంత తక్కువ దృశ్యమానత (Low Visibility) ఉన్న సమయాల్లో కూడా విమానాలు సురక్షితంగా ల్యాండింగ్, టేకాఫ్ కావడానికి ఈ క్యాట్-III వ్యవస్థ అత్యంత కీలకంగా వ్యవహరిస్తుంది. గతంలో తక్కువ విజిబిలిటీ కారణంగా విమానాలను ఇతర నగరాలకు మళ్లించడం లేదా గంటల తరబడి ఆలస్యంగా నడపడం వంటి సమస్యలు తలెత్తేవి. ఈ అప్‌గ్రేడ్‌తో అలాంటి సమస్యలకు చెక్ పడటమే కాకుండా, ప్రయాణికులకు మరింత సమర్థవంతమైన, నమ్మదగిన సేవలు అందుబాటులోకి వస్తాయని ఎయిర్‌పోర్ట్ వర్గాలు తెలిపాయి.

ఈ ఆధునీకరణ ప్రాజెక్టులో భాగంగా రన్‌వేపై అత్యాధునిక క్యాట్-III కంప్లైంట్ లైటింగ్ సిస్టమ్‌తో పాటు స్టాండ్ మానూవ్రింగ్ గైడెన్స్ లైట్స్, అధునాతన మానిటరింగ్ వ్యవస్థలను అమర్చారు. వీటికితోడు, ఎయిర్‌పోర్ట్ ప్రిడిక్టివ్ ఆపరేషన్ సెంటర్ నుంచి రన్‌వే లైటింగ్ నెట్‌వర్క్‌ను నిరంతరం పర్యవేక్షించేందుకు, నియంత్రించేందుకు వీలుగా పూర్తి స్వదేశీ పరిజ్ఞానంతో రూపొందించిన PLC-SCADA ఆధారిత కేంద్రీకృత వ్యవస్థను కూడా విజయవంతంగా ప్రవేశపెట్టారు.

ఈ సమగ్ర 'ఆల్-వెదర్' ఏవియేషన్ అప్‌గ్రేడ్‌తో శంషాబాద్ విమానాశ్రయం అంతర్జాతీయ స్థాయి మౌలిక వసతుల ప్రమాణాలను మరింత పటిష్టం చేసుకుంది. రద్దీ ఎక్కువగా ఉండే సమయాల్లో సైతం ఎయిర్‌క్రాఫ్ట్ కార్యకలాపాలను ఎటువంటి ఆటంకం లేకుండా నిర్వహించేందుకు ఇది దోహదపడుతుందని జీహెచ్ఐఏఎల్ అధికారులు స్పష్టం చేశారు.