తెలంగాణ మూలాలు ఉన్న ఓ యువకుడు అమెరికాలో అనుమానాస్పద స్థితిలో మృతిచెందాడు. ఉన్నత చదువులు పూర్తి చేసుకుని, ఉద్యోగంలో స్థిరపడేందుకు సన్నాహాలు చేసుకుంటున్న సమయంలో ఈ విషాదం చోటుచేసుకోవడంతో ఆ కుటుంబంలో తీవ్ర శోకం అలుముకుంది.

బాధిత కుటుంబ వివరాల ప్రకారం.. వెల్మ రిషిరెడ్డి (21) అమెరికాలోని ఓహియోలో నివాసం ఉంటున్నాడు. జగిత్యాల జిల్లా మల్యాల మండలం రామన్నపేట గ్రామానికి చెందిన రిషిరెడ్డి కుటుంబం దాదాపు 25 సంవత్సరాల క్రితమే అమెరికా వెళ్లి అక్కడే స్థిరపడింది. ఇటీవల ఇంజినీరింగ్ పూర్తి చేసుకున్న రిషిరెడ్డి, ఉద్యోగం కోసం ప్రయత్నాలు మొదలుపెట్టాడు.

ఈ క్రమంలో రెండు రోజుల క్రితం ఒహాయోలోని తన హాస్టల్ గదిలో రిషిరెడ్డి అనుమానాస్పద రీతిలో విగతజీవిగా కనిపించాడు. గదిలో అచేతనంగా పడి ఉన్న అతడిని గమనించిన స్నేహితులు వెంటనే కుటుంబసభ్యులకు సమాచారం అందించారు. అప్పటివరకు ఎంతో ఉత్సాహంగా ఉన్న కుమారుడు ఉన్నట్టుండి ప్రాణాలు కోల్పోయాడన్న వార్త తెలిసి తల్లిదండ్రులు, కుటుంబసభ్యులు తీవ్ర దిగ్భ్రాంతికి గురయ్యారు.

రిషిరెడ్డి మృతికి గల కచ్చితమైన కారణాలు ఇంకా తెలియరాలేదు. ప్రస్తుతం పోస్ట్‌మార్టం ప్రక్రియ కొనసాగుతుండగా, నివేదిక వచ్చిన తర్వాతే మరణానికి గల కారణాలు తెలిసే అవకాశముంది. రిషిరెడ్డి నాయనమ్మ ఇప్పటికీ తమ స్వగ్రామమైన రామన్నపేటలోనే నివసిస్తుండటంతో, విషయం తెలిసిన గ్రామస్తులు తీవ్ర విచారం వ్యక్తం చేస్తున్నారు.