స్టార్ హీరో సూర్య అభిమానులు ఎంతగానో ఎదురుచూస్తున్న 'సీన్' సినిమా ట్రైలర్ శనివారం విడుదలైంది. యువ సంచలన దర్శకుడు జిత్తు మాధవన్ దర్శకత్వంలో వస్తున్న ఈ సినిమా ట్రైలర్‌ను సూర్య తన సోషల్ మీడియా ఖాతాలో పంచుకున్నారు. "హత్య, మిస్టరీ, క్రేజీనెస్... దానికి తోడు బోలెడంత నవ్వు! ఈ దీపావళికి మీ కుటుంబసభ్యులు, స్నేహితులతో కలిసి థియేటర్లలో 'సీన్' సినిమాను ఆస్వాదించండి" అని ఆయన పోస్ట్ చేశారు. ఈ చిత్రం నవంబర్ 6న దీపావళి కానుకగా ప్రేక్షకుల ముందుకు రానుంది.

ట్రైలర్ ఆరంభంలో, ఇన్బరాజ్ (సూర్య) పోలీస్ ఉద్యోగానికి రాజీనామా చేయాలని నిర్ణయించుకోవడంతో మొదలవుతుంది. ఉన్నతాధికారి స్టీఫెన్ (లాల్) ఆఫీసుకు రావాలని పదేపదే ఆదేశించినా పట్టించుకోకుండా ఇంట్లో విశ్రాంతి తీసుకుంటాడు. దీంతో, స్టీఫెన్ పోలీసులను పంపి ఇన్బరాజ్‌ను అరెస్ట్ చేసి తీసుకురమ్మని ఆదేశిస్తాడు. అయితే, సహకరించాలని కోరిన పోలీసులతో ఇన్బరాజ్ సరదాగా ప్రవర్తిస్తాడు. అవసరమైతే ఎత్తుకునైనా తీసుకురావాలని ఆర్డర్ ఉందని చెప్పడంతో, ఏమాత్రం బెదరకుండా తనను ఎత్తుకెళ్లమన్నట్టుగా చేతులు, కాళ్లు చాపి నవ్వులు పూయిస్తాడు.

ఆ తర్వాత స్టీఫెన్ ఆఫీసులో, ఉద్యోగం మానేసి ఏం చేస్తావని అడిగితే, రాజకీయాల్లోకి వెళతానని ఇన్బరాజ్ సమాధానం ఇస్తాడు. మరోవైపు, ఇంట్లో పనిమనిషి కోసం ప్రకటన ఇస్తే, ఆ ఉద్యోగానికి మాయ (నజ్రియా) వస్తుంది. ఇక ఈశ్వర్ (నస్లెన్) అనే క్రూరమైన, తెలివైన నేరస్థుడిని పట్టుకోవాలంటే, అతనికి సరిసమానమైన తెలివితేటలు ఉన్న అధికారి కావాలని ట్రైలర్‌లో చూపించారు. ఈశ్వర్ పాత్రలో నస్లెన్ నటిస్తున్నాడు. "నేను నీకు సమానమా?" అంటూ సూర్య తనదైన శైలిలో చెప్పే డైలాగ్ ఆకట్టుకుంటుంది.

యాక్షన్, మిస్టరీతో పాటు కామెడీకి కూడా పెద్దపీట వేసినట్టు ట్రైలర్ స్పష్టం చేస్తోంది. ఇందులో హీరోయిన్ నజ్రియా కూడా కొన్ని యాక్షన్ సన్నివేశాల్లో కనిపించడం విశేషం. గతేడాది డిసెంబర్‌లో పూజా కార్యక్రమాలతో ప్రారంభమైన ఈ చిత్రాన్ని జగరం స్టూడియోస్ నిర్మిస్తోంది. ఇప్పటివరకు 'సూర్య 47' అనే వర్కింగ్ టైటిల్‌తో ఈ సినిమాపై అంచనాలు నెలకొన్నాయి. ఈ చిత్రానికి సుషిన్ శ్యామ్ సంగీతం అందిస్తుండగా, వినీత్ అగస్త్యన్ సినిమాటోగ్రఫీ బాధ్యతలు నిర్వర్తిస్తున్నారు. మొత్తానికి ట్రైలర్ సినిమాపై అంచనాలను మరింత పెంచేసింది.
Play video