విక్టరీ వెంకటేశ్‌ ప్రధాన పాత్రలో నటించిన ‘ఆదర్శ కుటుంబం హౌస్‌ నంబర్‌ 47’ బాక్సాఫీస్‌ వద్ద మంచి ఆరంభాన్ని అందుకుంది. విడుదలైన తొలిరోజే ప్రపంచవ్యాప్తంగా రూ.16.65 కోట్ల గ్రాస్‌ వసూలు చేసినట్లు ట్రేడ్‌ వర్గాల సమాచారం. దీంతో 2026లో తొలి రోజు అత్యధిక వసూళ్లు సాధించిన తెలుగు చిత్రాల జాబితాలో టాప్‌-7లో చోటు దక్కించుకుంది. వెంకటేశ్‌ కెరీర్‌లోనూ ఈ ఓపెనింగ్‌ ప్రత్యేకంగా నిలిచింది.

అడ్వాన్స్‌ బుకింగ్స్‌ ద్వారా కూడా ఈ సినిమా మంచి స్పందన అందుకుంది. ప్రీమియర్‌ షోలు సహా తొలి రోజు ప్రీ-సేల్స్‌ ద్వారా బ్లాక్‌ చేసిన సీట్లతో కలిపి రూ.3.56 కోట్ల గ్రాస్‌ నమోదైంది. బ్లాక్‌ చేసిన సీట్లను మినహాయిస్తే ఈ మొత్తం రూ.2.58 కోట్లు. అడ్వాన్స్‌ బుకింగ్స్‌తో పోలిస్తే తొలి రోజు వసూళ్లు 4.32 రెట్లు పెరిగాయి. 

తొలి రోజు వసూళ్లలో ఆంధ్రప్రదేశ్‌, తెలంగాణ ప్రధాన వాటా అందించాయి. ఈ రెండు రాష్ట్రాల్లో కలిపి రూ.9.25 కోట్ల గ్రాస్‌ నమోదైంది. మొత్తం దేశీయ వసూళ్లలో ఇది 83 శాతం. కర్ణాటకలో రూ.1.40 కోట్లు, తమిళనాడులో రూ.30 లక్షలు, కేరళంలో రూ.2 లక్షలు, ఇతర ప్రాంతాల్లో రూ.18 లక్షలు వచ్చాయి. 

2026లో తొలి రోజు అత్యధిక ప్రపంచవ్యాప్త వసూళ్లు సాధించిన తెలుగు చిత్రాల జాబితాలో ‘పెద్ది’ రూ.110.49 కోట్లతో అగ్రస్థానంలో ఉంది. ‘ది రాజాసాబ్‌’, ‘ది ప్యారడైజ్‌’, ‘మన శంకరవరప్రసాద్‌ గారు’, ‘ఉస్తాద్‌ భగత్‌సింగ్‌’ తర్వాతి స్థానాల్లో ఉన్నాయి. ‘ఇరుముడి’ రూ.23.75 కోట్లతో ఆరో స్థానంలో నిలిచింది. రూ.16.65 కోట్లతో ‘ఆదర్శ కుటుంబం’ ఏడో స్థానాన్ని దక్కించుకుంది. విజయ్‌ దేవరకొండ ‘రణబాలి’, ‘అనగనగా ఒక రాజు’, ‘మా ఇంటి బంగారం’ చిత్రాలను అధిగమించింది.