కడప జిల్లాలో మున్సిపల్ ఎన్నికల పోలింగ్ వేళ ఉద్రిక్త వాతావరణం నెలకొంది. కడప, పులివెందులలో అధికార టీడీపీ కూటమి నేతలు అరాచకాలకు పాల్పడుతున్నారని, వైసీపీ ఓటర్లను భయభ్రాంతులకు గురిచేస్తున్నారని కడప ఎంపీ వైఎస్ అవినాశ్ రెడ్డి తీవ్ర ఆరోపణలు చేశారు. పోలింగ్ రోజున వైసీపీని ఇబ్బంది పెట్టాలనే లక్ష్యంతోనే కూటమి నేతలు దౌర్జన్యాలకు దిగుతున్నారని ఆయన ఆవేదన వ్యక్తం చేశారు.

టీడీపీ నాయకులు ఇంటింటికీ వెళ్లి, ఓట్లు వేయడానికి రావొద్దని వైసీపీ సానుభూతిపరులను బెదిరిస్తున్నారని అవినాశ్ రెడ్డి ఆరోపించారు. అంతేకాకుండా, అసలైన ఓటర్ల స్లిప్పులను దొంగ ఓటర్లకు పంచుతూ అక్రమాలకు పాల్పడుతున్నారని మండిపడ్డారు. కూటమి ప్రభుత్వ అక్రమాలు, దౌర్జన్యాలపై న్యాయపోరాటం చేస్తామని ఆయన హెచ్చరించారు. ఎన్నికల అనంతరం ఎలక్షన్ పిటిషన్లు దాఖలు చేసి, ఈ దౌర్జన్యాలను కోర్టు దృష్టికి తీసుకెళతామని స్పష్టం చేశారు. ప్రతి పోలింగ్ బూత్‌లో సీసీ ఫుటేజ్‌ను భద్రపరచాలని సుప్రీంకోర్టు ఆదేశాలు ఉన్నాయని ఈ సందర్భంగా గుర్తుచేశారు.

ఎన్నికలు స్వేచ్ఛాయుత వాతావరణంలో జరిగేందుకు అందరూ సహకరించాలని, బయట నియోజకవర్గాల నుంచి ఎవరూ రావొద్దని అవినాశ్ రెడ్డి విజ్ఞప్తి చేశారు. కాగా, వైసీపీ అధినేత వైఎస్ జగన్ పర్యటనలో మార్పు జరిగిందని, అందరి సూచనల మేరకు ఆయన ఆదివారం మధ్యాహ్నం పులివెందులకు వస్తారని తెలిపారు.