పెళ్లి విందు ఇస్తే లక్ష ఫైన్.. గ్రామస్థుల కఠిన నిర్ణయం

అప్పుల ఊబిలో కూరుకుపోవడానికి కారణమవుతున్న అనవసరపు ఖర్చులకు అడ్డుకట్ట వేసేందుకు ఓ గ్రామం తీసుకున్న నిర్ణయం అందరి ప్రశంసలు అందుకుంటోంది. పెళ్లి తర్వాత ఇచ్చే ఖరీదైన మాంసాహార విందును పూర్తిగా నిషేధిస్తూ గ్రామస్థులంతా ఏకగ్రీవంగా తీర్మానం చేశారు. ఈ నిబంధనను ఉల్లంఘించి విందు ఏర్పాటు చేస్తే ఏకంగా లక్ష రూపాయలు, ఆ విందుకు హాజరైన వారికి 50 వేల రూపాయల జరిమానా విధించనున్నట్లు ప్రకటించారు. కర్ణాటకలోని శివమొగ్గ (షిమోగా) జిల్లా, శికారిపుర తాలూకా పరిధిలోని హరగి గ్రామంలో ఈ వినూత్న నిర్ణయం తీసుకున్నారు.

గ్రామంలోని సుమారు 360 కుటుంబాలు (అన్ని కులాలతో కలిపి) స్థానిక ఆంజనేయ స్వామి ఆలయం వద్ద సమావేశమై ఈ కఠిన నిర్ణయాన్ని ఆమోదించాయి. దీని వెనుక బలమైన కారణాలను గ్రామస్తుడు కేబీ శేఖరాజ్ వివరించారు. "గ్రామంలో తీవ్రమైన కరవు నెలకొంది. వరుసగా పంటలు నష్టపోవడంతో రైతులు, ఇతర కుటుంబాలు ఆర్థికంగా చితికిపోయాయి. ఇలాంటి పరిస్థితుల్లోనూ పెళ్లి తర్వాత ‘బీగర ఊట’ (వరుడి కుటుంబం ఇచ్చే మాంసాహార విందు) ఇవ్వడం సామాజిక గౌరవంగా మారింది. స్థోమత లేని వారు కూడా అప్పులు చేసి మరీ ఈ విందులు ఏర్పాటు చేయాల్సి వస్తోంది. దీంతో చాలా కుటుంబాలు రుణాల భారంతో కుంగిపోతున్నాయి" అని ఆయన తెలిపారు.

ఈ సమస్యకు పరిష్కారంగానే గ్రామస్థులందరూ కలిసి ఈ నిర్ణయం తీసుకున్నారు. అయితే, పెళ్లి తంతు, ఇతర మతపరమైన కార్యక్రమాలను యథావిధిగా జరుపుకోవచ్చని స్పష్టం చేశారు. కేవలం దగ్గరి బంధువులు, కుటుంబ సభ్యులతో (10-20 మంది) సాధారణ భోజనాలు చేసుకోవడానికి ఎలాంటి అభ్యంతరం లేదని తెలిపారు. గ్రామం మొత్తాన్ని పిలిచి భారీ ఎత్తున విందులు ఇవ్వడంపైనే నిషేధం ఉంటుందని తేల్చిచెప్పారు.

కర్ణాటకలోని పాత మైసూరు, మల్నాడ్ ప్రాంతాల్లో ‘బీగర ఊట’ అనేది ఒక సంప్రదాయం. కాలక్రమేణా ఇది హోదా ప్రదర్శనగా మారడంతో, హరగి గ్రామస్థులు తీసుకున్న ఈ నిర్ణయం చర్చనీయాంశంగా మారింది. చుట్టుపక్కల గ్రామాల ప్రజలు కూడా ఈ నిర్ణయాన్ని మెచ్చుకుంటూ, ఇలాంటి ఆర్థిక క్రమశిక్షణ పాటించడం అవసరమని అభిప్రాయపడుతున్నారు.