ఈ వెబ్సైట్లతో జర భద్రం.. నకిలీ వెబ్సైట్లను గుర్తించడం ఎలా?
- పెరిగిపోతున్న ఆన్లైన్ మోసాలపై అప్రమత్తత అవసరం
- వెబ్సైట్ యూఆర్ఎల్, డిజైన్ను క్షుణ్ణంగా పరిశీలించడం ముఖ్యం
- సంప్రదింపుల వివరాలు, పాలసీలు లేకపోతే అనుమానించాల్సిందే
- నకిలీ సైట్లను గుర్తించేందుకు నిపుణుల కీలక సూచనలు
నకిలీ సైట్లను ఇలా గుర్తించవచ్చు!
తొలుత బ్రౌజర్లోని వెబ్సైట్ అడ్రస్ (యూఆర్ఎల్)ను నిశితంగా పరిశీలించాలి. సురక్షితమైన వెబ్ సైట్లు సాధారణంగా https:// తో ప్రారంభమై, పక్కనే లాక్ గుర్తును కలిగి ఉంటాయి. http:// ఉంటే మాత్రం జాగ్రత్త పడాలి. మోసగాళ్లు తరుచుగా యూఆర్ఎల్లో చిన్నపాటి మార్పులు చేస్తూ ఉంటారు. వెబ్ సైట్ డొమైన్లో అక్షరాలు ఏవైనా మారాయేమో గమనించాలి. స్పెల్లింగ్ తప్పులు, అసలు డొమైన్కు దగ్గరగా ఉండే నకిలీ పేర్లు కనిపిస్తే అనుమానించాలి. వెబ్ సైట్లో సంప్రదింపు నెంబర్లు, పాలసీ వివరాలు లేకపోయినా జాగ్రత్త వహించాలి.
అధికారిక వెబ్సైట్లు ప్రొఫెషనల్ డిజైన్తో, ఎటువంటి వ్యాకరణ దోషాలు లేకుండా ఉంటాయి. నకిలీ సైట్లలో డిజైన్ నాసిరకంగా ఉండటమే కాకుండా అక్షర దోషాలు ఎక్కువగా కనిపిస్తాయి. "ఉచిత ల్యాప్టాప్లు", "ఒక్క క్లిక్తో ప్రభుత్వ ఉద్యోగం", "భారీ బహుమతులు" వంటి ఆకర్షణీయమైన ప్రకటనలను త్వరగా నమ్మకూడదు. భారీ ఆఫర్ల పేరుతో వ్యక్తిగత వివరాలు లేదా నగదు కోరితే వెంటనే అప్రమత్తం కావాలి.
ఈమెయిల్స్ లేదా మెసేజ్ల ద్వారా వచ్చే అనుమానాస్పద లింక్లను క్లిక్ చేయకూడదు. నేరుగా బ్రౌజర్లో అధికారిక వెబ్సైట్ పేరును టైప్ చేసి ఓపెన్ చేయడం సురక్షితం. ఆన్లైన్ లావాదేవీల కోసం టూ-ఫ్యాక్టర్ అథెంటికేషన్, నాణ్యమైన యాంటీవైరస్ సాఫ్ట్వేర్లను ఉపయోగించడం శ్రేయస్కరం. ఏదైనా అనుమానాస్పద వెబ్ సైట్ గుర్తిస్తే, వెంటనే జాతీయ సైబర్ క్రైమ్ రిపోర్టింగ్ పోర్టల్లో ఫిర్యాదు చేయడం ద్వారా ఇతరులు మోసపోకుండా కాపాడవచ్చు. నకిలీ వెబ్ సైట్లలో సాధారణంగా అత్యధికంగా ప్రకటనలు, క్లిక్-బైట్ ఆఫర్లు కనిపిస్తుంటాయని నిపుణులు గుర్తు చేస్తున్నారు.
