ఇంట్లోనే సినిమా థియేటర్‌ అనుభూతిని పొందాలనుకునేవారి కోసం ఎల్‌జీ భారీ టీవీని భారత మార్కెట్లో విడుదల చేసింది. 115 అంగుళాల క్యూనెడ్‌ ఇవో ఏఐ మినీ ఎల్ఈడీ టీవీని రూ.14,99,990 ధరతో తీసుకొచ్చింది. 4కే రిజల్యూషన్‌, ఏఐ ఆధారిత పిక్చర్‌ ప్రాసెసింగ్‌, గేమింగ్‌ ఫీచర్లు దీని ప్రత్యేకతలు.

ఈ టీవీలో 3,840×2,160 పిక్సెళ్ల 4కే డిస్‌ప్లే ఉంది. మినీ ఎల్‌ఈడీ బ్యాక్‌లైటింగ్‌, ప్రెసిషన్‌ డిమ్మింగ్‌ అల్ట్రా టెక్నాలజీతో చిత్రాల్లోని రంగులు, వెలుతురు, చీకటి భాగాలను మెరుగ్గా చూపిస్తుంది. డాల్బీ విజన్‌, హెచ్‌డీఆర్‌10, హెచ్‌ఎల్‌జీ ఫార్మాట్లకు మద్దతు ఉంది. ఆల్ఫా 8 ఏఐ ప్రాసెసర్‌ 4కే జెన్‌ 3 చిత్రాల నాణ్యతను మెరుగుపరుస్తుంది.

ఈ టీవీలో సాధారణ రిఫ్రెష్‌ రేట్‌ 120Hz. వీఆర్‌ఆర్‌ సాయంతో 165Hz వరకు మద్దతు లభిస్తుంది. మోషన్‌ బూస్టర్‌ ఫీచర్‌ ద్వారా 330Hz వరకు మోషన్‌ రేట్‌ అందుబాటులో ఉంటుంది. ఏఎండీ ఫ్రీసింక్‌ ప్రీమియం, ఆటో లో లాటెన్సీ మోడ్‌ వంటి సదుపాయాలూ ఉన్నాయి. వేగంగా కదిలే దృశ్యాలను మరింత సాఫీగా చూపించేందుకు ఇవి ఉపయోగపడతాయి.

ఈ టీవీ 'వెబ్‌ఓఎస్‌ 26' ఆపరేటింగ్‌ సిస్టమ్‌పై పనిచేస్తుంది. గూగుల్‌ జెమినీ, మైక్రోసాఫ్ట్‌ కోపైలట్‌ ఆధారిత ఏఐ సదుపాయాలు ఉన్నాయి. వాయిస్‌ ఐడీ, ఏఐ కాన్సీర్జ్‌ ద్వారా వ్యక్తిగత అభిరుచులకు అనుగుణంగా సూచనలు పొందవచ్చు. 40W స్పీకర్‌ వ్యవస్థతో పాటు డాల్బీ ఆట్మోస్‌, వర్చువల్‌ 11.1.2 ఛానల్‌ సరౌండ్‌ సౌండ్‌ సదుపాయాలు ఉన్నాయి. నాలుగు హెచ్‌డీఎంఐ పోర్టులు, రెండు యూఎస్‌బీ పోర్టులనూ అందించారు. 

ఈ టీవీ ధరను ఎల్‌జీ రూ.14,99,990గా ప్రకటించింది. అయితే విక్రయాలు ఎప్పటి నుంచి ప్రారంభమవుతాయనే విషయాన్ని కంపెనీ ఇంకా వెల్లడించలేదు.