ముంబై మెట్రో అద్భుతం.. భారత్ నుంచి అమెరికా నేర్చుకోవాలి: అమెరికన్ మహిళ వీడియో వైరల్
- ముంబై మెట్రో ప్రయాణంపై అమెరికన్ మహిళ ప్రశంసలు
- టికెట్ ధర, శుభ్రత, మహిళల కంపార్ట్మెంట్కు ఆశ్చర్యం
- న్యూయార్క్ సబ్వే కంటే ముంబై మెట్రో చాలా మేలని వ్యాఖ్య
లిజ్ అనే ఈ అమెరికన్ మహిళ, 'ముంబై మెట్రో ఎక్స్పీరియన్స్' పేరుతో ఇన్స్టాగ్రామ్లో ఒక వీడియో పోస్ట్ చేశారు. తాను మొదటిసారి ముంబై మెట్రోలో ప్రయాణిస్తున్నానని, కేవలం 20 రూపాయలకే టికెట్ లభించడం ఆశ్చర్యంగా ఉందని తెలిపారు. "స్టేషన్ చాలా శుభ్రంగా ఉంది. ఇక్కడి ప్లాట్ఫామ్ డోర్లు ప్రయాణికులకు మరింత భద్రతను ఇస్తున్నాయి" అని ఆమె వీడియోలో పేర్కొన్నారు.
రైలు ఎక్కగానే ఆమె మరింత ఆశ్చర్యపోయారు. "వావ్, న్యూయార్క్ సబ్వే కంటే ముంబై మెట్రో చాలా శుభ్రంగా ఉంది. బయట చాలా వేడిగా ఉండే ముంబైలో, మెట్రోలోని ఏసీ చాలా చల్లగా, హాయిగా ఉంది" అని ఆమె అన్నారు. మహిళల కోసం ప్రత్యేకంగా కంపార్ట్మెంట్ ఉండటాన్ని ఆమె ప్రత్యేకంగా ప్రస్తావించారు. "ఇలాంటి సౌకర్యం నేను ఏ ఇతర దేశంలోనూ చూడలేదు. ఇక్కడి మెట్రో అద్భుతంగా ఉంది. అమెరికా భారత్ నుంచి నేర్చుకోవాలి" అని లిజ్ స్పష్టం చేశారు.
ఈ వీడియో వైరల్ అవ్వడంతో నెటిజన్లు తమదైనశైలిలో స్పందిస్తున్నారు. చాలా మంది ఆమెకు 'ముంబైకి స్వాగతం' అంటూ కామెంట్లు పెట్టగా, 'మీరు ఒక్క మాటతో మొత్తం దృశ్యాన్ని మార్చేశారు' అని మరొకరు అన్నారు. భారత ప్రజా రవాణా వ్యవస్థలోని సానుకూల అంశాలు చాలా అరుదుగా వైరల్ అవుతాయని కొందరు అభిప్రాయపడ్డారు. 'బంగ్లాదేశ్ రైల్వేలకు చెందిన వీడియోలను కూడా భారతదేశం పేరుతో వైరల్ చేస్తారు, కానీ ఇలాంటి మంచి విషయాలు ప్రచారంలోకి రావు' అని ఓ యూజర్ ఆవేదన వ్యక్తం చేశారు. మరోవైపు 'ఢిల్లీ మెట్రో ప్రపంచంలోనే అత్యుత్తమమైనది, మీరు దాన్ని కూడా ప్రయత్నించాలి' అంటూ మరో నెటిజన్ ఆమెకు సూచించారు. మొత్తంగా ఈ వీడియో, భారత మౌలిక సదుపాయాలపై సానుకూల చర్చకు దారితీసింది.
వీడియో కోసం ఇక్కడ క్లిక్ చేయండి
