Indian Medicine: ఇండియన్ మెడిసిన్‌కు ఫిదా అయిన అమెరికన్.. వీడియో వైరల్

పశ్చిమ దేశాల వైద్య వ్యవస్థలతో పోలిస్తే భారత ఆరోగ్య సంరక్షణ వ్యవస్థ ఎంతో ఉన్నతమైనదని, ఇది తనకు కనువిప్పు కలిగించిందని అమెరికాకు చెందిన కంటెంట్ క్రియేటర్ చార్లీ ఎవాన్స్ ప్రశంసల వర్షం కురిపించాడు. ప్రస్తుతం రిషికేశ్‌లో పర్యటిస్తున్న అతడు, ఇటీవల అనారోగ్యం నుంచి కోలుకున్న తన అనుభవాన్ని వివరిస్తూ సోషల్ మీడియాలో పోస్ట్ చేసిన వీడియో ప్రస్తుతం వైరల్ అవుతోంది. ఆయుర్వేదం, ఆధునిక వైద్య విధానాల కలయికతో పాటు భారత్‌లో వైద్యం పొందే సౌలభ్యం తనను ఎంతగానో ఆకట్టుకుందని పేర్కొన్నాడు.

గత 148 రోజులుగా తాను భారత్‌లో నివసిస్తున్నానని, ఇటీవల అనారోగ్యంతో రెండుసార్లు ఆసుపత్రికి వెళ్లానని చార్లీ తన వీడియోలో తెలిపాడు. "పశ్చిమ దేశాల వైద్యం కన్నా భారత వైద్యం ఎందుకు గొప్పదో నేను మీకు చెబుతాను" అంటూ తన అనుభవాన్ని వివరించాడు. రాజస్థాన్ పర్యటనలో ఉన్నప్పుడు తనకు గొంతునొప్పి (స్ట్రెప్ థ్రోట్) వచ్చిందని, అయితే భారత్‌లో ఆసుపత్రికి వెళ్లడం చాలా సులభమని తెలియక రిషికేశ్ వచ్చేవరకు వైద్యం తీసుకోలేదని, అది తాను చేసిన పెద్ద తప్పిదమని అన్నాడు.

భారత్‌లో లభించే యోగి కంఠిక పిల్స్, దగ్గు మందులు అద్భుతంగా పనిచేస్తాయని చార్లీ కొనియాడారు. "ఇలాంటివి అమెరికాలో దొరకవు. ఇక్కడి దగ్గు మందుల్లో వాడే పదార్థాలు చాలా మేలైనవి" అని అభిప్రాయపడ్డాడు. భారతీయులు ఆరోగ్యంపై శ్రద్ధ చూపుతారని, చాలామంది ఇళ్లలో ఉండే ఆయుర్వేద గృహ చిట్కాలు ఎంతగానో సహాయపడతాయని అన్నాడు. "భారత్‌లో ఉంటే మీ స్నేహితులే మీకు సహజసిద్ధమైన మందులు ఇస్తారు. నా స్నేహితుడు ఇచ్చిన సహజమైన విక్స్‌లాంటి బామ్‌ను వాడాను. ఫార్మసీ లేదా ఎమర్జెన్సీ రూమ్‌కు వెళ్లకుండానే ఇక్కడ వైద్యం అందుతుంది" అని ఎవాన్స్ వివరించాడు.

"భారత వైద్యం నిజంగా గాడ్-టియర్ (దైవ సమానం). అనారోగ్యం నుంచి త్వరగా కోలుకోవడానికి ఇంటి చిట్కాలు, ఆయుర్వేదం, ఆధునిక మందులు అన్నీ కలిసి పనిచేయడం నాకు కనువిప్పు కలిగించింది" అని చార్లీ తన వీడియోకు క్యాప్షన్ జతచేశాడు. ఈ వీడియోకు ఇప్పటికే 2 లక్షలకు పైగా వ్యూస్ వచ్చాయి. చార్లీ అభిప్రాయంతో నెటిజన్లు ఏకీభవిస్తున్నారు. 

అమెరికాలో లాగా కాకుండా భారత్‌లో సులువుగా, తక్కువ ఖర్చుతో వైద్యం అందుతుందని పలువురు కామెంట్లు చేశారు. "భారత్‌లో నేరుగా ఆసుపత్రికి వెళ్లి వైద్యం చేయించుకోవచ్చు. కానీ అమెరికాలో నెలల తరబడి వేచి చూడాలి, ఇన్సూరెన్స్ చాలా ఖరీదు" అని ఒక యూజర్ పేర్కొన్నారు. ఆయుర్వేదం, అల్లోపతి, హోమియోపతి వంటి విభిన్న వైద్య విధానాలు అందుబాటులో ఉండటం భారత్ ప్రత్యేకత అని మరికొందరు అభిప్రాయపడ్డారు.