టీమిండియా స్టార్ బ్యాటర్ విరాట్ కోహ్లీ మైదానంలో ఎంతో చురుగ్గా, సరదాగా ఉంటాడు. నిన్న‌ న్యూజిలాండ్‌తో జరిగిన తొలి వన్డేలో అతను కివీస్ బ్యాటర్ గ్లెన్ ఫిలిప్స్‌ను ఆటపట్టించిన తీరు సోషల్ మీడియాలో వైరల్‌గా మారింది. ప్రముఖ డబ్ల్యూడబ్ల్యూఈ రెజ్లర్ జాన్ సేనా ట్రేడ్‌మార్క్ జెస్చర్ అయిన 'యు కాంట్ సీ మీ' అంటూ కోహ్లీ చేసిన సైగలు అభిమానులను ఆకట్టుకున్నాయి.

ఆక్లాండ్‌లోని ఈడెన్ పార్క్‌లో ఈ సంఘటన జరిగింది. మ్యాచ్ 15వ ఓవర్లో గ్లెన్ ఫిలిప్స్ బ్యాటింగ్‌కు వచ్చాడు. న్యూజిలాండ్‌లో అతను క్రీజ్‌లోకి అడుగుపెట్టినప్పుడల్లా జాన్ సేనా ఎంట్రన్స్ థీమ్ సాంగ్‌ను ప్లే చేయడం అక్కడి డీజేకు అలవాటు. ఆ పాట ప్లే అవుతుండగా, ఫిలిప్స్ మరో బ్యాటర్ డారిల్ మిచెల్‌తో మాట్లాడుతున్నాడు. అదే సమయంలో పిచ్‌కు అవతలి వైపు నుంచి కోహ్లీ 'యు కాంట్ సీ మీ' అంటూ సైగ చేశాడు. అయితే వారు పట్టించుకోకపోవడంతో ఫిలిప్స్ గార్డ్ తీసుకునేందుకు వెళుతుండగా కోహ్లీ అతని దగ్గరకు వెళ్లి మళ్లీ అదే జెస్చర్‌ను రిపీట్ చేశాడు.

ఈ సరదా సన్నివేశానికి సంబంధించిన వీడియోలు, రీల్స్ సోషల్ మీడియాలో క్షణాల్లో వైరల్ అయ్యాయి. కోహ్లీ చేసిన పనికి అభిమానులు నవ్వుకుంటూ కామెంట్లు పెడుతున్నారు. ఇదిలా ఉంటే.. ఇదే మ్యాచ్‌లో విరాట్ ఓ అరుదైన రికార్డును తన ఖాతాలో వేసుకున్నాడు. 'సేనా' (సౌతాఫ్రికా ఇంగ్లాండ్, న్యూజిలాండ్, ఆస్ట్రేలియా) దేశాలన్నింటిలోనూ 50కి పైగా వన్డే సగటు నమోదు చేసిన తొలి బ్యాటర్‌గా చరిత్ర సృష్టించాడు.