దీపావళి పండగకు ఉద్యోగులకు స్వీట్లు, గిఫ్ట్‌ హ్యాంపర్లు ఇవ్వడం సాధారణం. అయితే ఢిల్లీలోని ఓ కంపెనీ మాత్రం తన ఉద్యోగులకు ఏకంగా ఐఫోన్ 16 ఫోన్లను బహుమతిగా ఇచ్చి అందరి దృష్టిని ఆకర్షించింది. ఇందుకు సంబంధించిన వీడియో సోషల్ మీడియాలో వైరల్‌గా మారింది.

న్యూఢిల్లీలోని రోహిణి ప్రాంతానికి చెందిన ఓ కంపెనీ తన అధికారిక ఇన్‌స్టాగ్రామ్ ఖాతాలో ఈ వీడియోను షేర్ చేసింది. 15 సెకన్ల నిడివి ఉన్న ఈ క్లిప్‌లో ఉద్యోగుల డెస్క్‌లపై రిబ్బన్లతో అలంకరించిన ఐఫోన్ 16 ఫోన్లు కనిపిస్తున్నాయి. తెలుపు, ఆకుపచ్చ, నీలం, నలుపు రంగుల్లో ఉన్న ఫోన్లను కంప్యూటర్ల ముందు ఉంచారు. బహుమతులు చూసిన పలువురు మహిళా ఉద్యోగులు ఆనందం వ్యక్తం చేయడం వీడియోలో కనిపించింది.

ఈ వీడియోను షేర్ చేస్తూ కంపెనీ ‘నో కాంపిటీషన్.. మీకు ఏం వచ్చింది?’ అనే క్యాప్షన్ ఇచ్చింది. దీంతో నెటిజన్లు పెద్ద సంఖ్యలో స్పందిస్తున్నారు. కంపెనీ ఇచ్చిన బహుమతిపై ప్రశంసలు కురిపిస్తున్నారు. తమకూ ఇలాంటి ఉద్యోగం కావాలంటూ కొందరు కామెంట్లు చేస్తున్నారు. మరికొందరు ఈ వీడియో నిజమైనదేనా? ఏఐతో రూపొందించారా? అంటూ సందేహాలు వ్యక్తం చేశారు. దీనిపై స్పందించిన కంపెనీ.. వీడియో ఏఐతో రూపొందించింది కాదని స్పష్టం చేసింది.

మహిళా ఉద్యోగులకు ఐఫోన్లు ఇస్తే, పురుష ఉద్యోగులకు బంగారు నాణేలు ఇచ్చారంటూ ఓ నెటిజన్ సరదాగా వ్యాఖ్యానించారు. తమ కంపెనీలో కనీసం స్వీట్ల బాక్స్ కూడా ఇవ్వలేదని మరొకరు వాపోయారు. మొత్తానికి ఉద్యోగులకు కంపెనీ ఇచ్చిన దీపావళి కానుక ఇప్పుడు సోషల్ మీడియాలో చర్చనీయాంశంగా మారింది.