ప్రముఖ టెక్ దిగ్గజం గూగుల్, ఐఐటీ ఖరగ్‌పూర్‌కు భారీ ఆర్థిక మద్దతు ప్రకటించింది. ఇన్‌స్టిట్యూట్‌లో ఆర్టిఫిషియల్ ఇంటెలిజెన్స్ (ఏఐ) ఆధారిత పరిశోధనలను వేగవంతం చేసేందుకు 5 మిలియన్ డాలర్ల (సుమారు రూ.46.34కోట్లు) నిధులను అందించనున్నట్లు గూగుల్ సీఈఓ సుందర్ పిచాయ్ శనివారం తెలిపారు. ఈ సహకారంతో భారతీయ భాషలు, వ్యవసాయం, విద్య వంటి రంగాల్లో ఐఐటీ చేస్తున్న పరిశోధనలకు మరింత ఊపు వస్తుందని ఆయన అన్నారు.

ఐఐటీ ఖరగ్‌పూర్ పూర్వ విద్యార్థి అయిన సుందర్ పిచాయ్, తమ సంస్థ అందిస్తున్న ఈ సాయంపై స్పందించారు. ఏఐ ప్రయోజనాలు దేశంలోని ప్రతి ఒక్కరికీ అందాలన్న ప్రధాని నరేంద్ర మోదీ దార్శనికతను అమలు చేయడంలో ఇలాంటి కార్యక్రమాలు సహాయపడతాయని ఆయన అభిప్రాయపడ్డారు. ఈ నిధులను మూడు ప్రధాన రంగాలపై కేటాయించనున్నారు. అత్యాధునిక ఏఐ పరిశోధనలు, విద్యార్థులకు అవకాశాలు కల్పించడం, సంస్థలో ఏఐ సామర్థ్యాన్ని పెంచడం వంటి వాటికి ఈ మొత్తాన్ని వినియోగిస్తారు.

ఈ చొరవలో భాగంగా ఐఐటీ ఖరగ్‌పూర్ పరిశోధకులు, విద్యార్థులు వాస్తవ ప్రపంచ సవాళ్లను పరిష్కరించే ప్రాజెక్టులను చేపడతారు. భారతదేశాన్ని గ్లోబల్ ఇన్నోవేషన్ హబ్‌గా మార్చే ప్రయత్నంలో భాగంగా ప్రపంచ టెక్ కంపెనీలు, విద్యాసంస్థలు ఏఐ రంగంలో పెట్టుబడులు పెంచుతున్న తరుణంలో ఈ ప్రకటన ప్రాధాన్యం సంతరించుకుంది.

విద్యాసంస్థలతో కలిసి పనిచేస్తూ, సమాజంపై సానుకూల ప్రభావం చూపే పరిష్కారాలను అభివృద్ధి చేయాలన్న తమ నిబద్ధతను ఈ నిధులు ప్రతిబింబిస్తాయని గూగుల్ పేర్కొంది. "అందరికీ ఉపయోగపడే ఏఐను రూపొందించడానికి బలమైన అకడమిక్ నాయకత్వం, భాగస్వామ్యం అవసరం. ఈ నిధుల ద్వారా భారతదేశంతో పాటు ప్రపంచవ్యాప్తంగా ఉన్న సమాజాలకు ప్రయోజనం చేకూర్చే సాంకేతిక పరిష్కారాలను అందించడంలో ఐఐటీ ఖరగ్‌పూర్‌కు మద్దతు ఇవ్వడం గౌరవంగా భావిస్తున్నాం" అని కంపెనీ ఒక ప్రకటనలో వివరించింది.