నిజమైనవి కాని షాపింగ్ సైట్లు, సోషల్ మీడియా ఫీడ్‌లు, బ్యాంక్ డ్యాష్‌బోర్డులతో నిండిన ఒక పూర్తి ఇంటర్నెట్‌ను ఊహించుకోండి. గూగుల్ సరిగ్గా అలాంటి ఒక నకిలీ ప్రపంచాన్నే నిర్మించింది. గూగుల్ క్రోమ్ కోసం రాబోతున్న కొత్త ఆర్టిఫిషియల్ ఇంటెలిజెన్స్ (ఏఐ) బ్రౌజింగ్ ఏజెంట్లకు సురక్షితంగా శిక్షణ ఇచ్చేందుకే ఈ ఏర్పాటు చేసింది.

గూగుల్ తన సెక్యూరిటీ బ్లాగ్‌లో వివరించిన దాని ప్రకారం, ఈ ప్రత్యామ్నాయ వెబ్ ప్రపంచాన్ని 'మిర్రర్ డైమెన్షన్' అని పిలుస్తున్నారు. ఇది ఒక భారీ, నియంత్రిత డిజిటల్ ప్రపంచంలా పనిచేస్తుంది. ఇందులో క్రోమ్ జెమిని ఆధారిత 'ఆటో బ్రౌజ్' ఫీచర్, నిజమైన వెబ్‌సైట్లను తాకకుండా లేదా యూజర్ల డేటాను ప్రమాదంలో పడవేయకుండా లింక్‌లను క్లిక్ చేయడం, ఫారమ్‌లను నింపడం, పాడ్‌కాస్ట్‌లను డౌన్‌లోడ్ చేయడం, ఆన్‌లైన్ షాపింగ్ చేయడం వంటివి నేర్చుకుంటుంది.

నిజమైన ఇంటర్నెట్‌ను ఎందుకు వాడలేదు?
రోజువారీ వెబ్ పనులను నిర్వహించడానికి ఒక ఏఐ ఏజెంట్‌కు శిక్షణ ఇవ్వాలంటే, వందలాది వెబ్‌సైట్‌లలో వేలాది పరీక్షలు నిర్వహించాల్సి ఉంటుంది. నిజమైన ఇంటర్నెట్‌లో ఇలా చేయడం వల్ల అనేక సమస్యలు తలెత్తుతాయి. నిజమైన వెబ్‌సైట్లు నిరంతరం మారుతూ ఉంటాయి, కాబట్టి ఇంజనీర్లు ఒకే పరీక్షను మళ్లీ మళ్లీ కచ్చితత్వంతో చేయడం కష్టమవుతుంది. అంతకంటే ముఖ్యంగా పూర్తి శిక్షణ లేని ఏఐని నేరుగా ఇంటర్నెట్‌లో వదిలేయడం చాలా ప్రమాదకరం. ఒక చిన్న పొరపాటు జరిగినా, అది నిజమైన ఖాతాలను దెబ్బతీయవచ్చు లేదా వాస్తవ నష్టాన్ని కలిగించవచ్చు.

'ఎవాల్ అవేర్‌నెస్' అనే మరో సమస్య కూడా ఉంది. ఆధునిక ఏఐ మోడళ్లు చాలా తెలివైనవి. అవి తాము ఒక పరీక్షలో ఉన్నామని గ్రహిస్తే, అసాధారణంగా జాగ్రత్తగా ప్రవర్తించడం మొదలుపెడతాయి. దీనివల్ల పరీక్ష ఫలితాలు తప్పుగా వస్తాయి. ఏఐ నిజంగా ఎలా ప్రవర్తిస్తుందో చూడటానికి, అది నిజమైన ప్రపంచంలో బ్రౌజ్ చేస్తున్నట్లుగా గూగుల్ దానిని నమ్మించాల్సి వచ్చింది.

నకిలీ ఇంటర్నెట్ ఏఐని ఎలా మోసం చేస్తుంది?
ఈ భ్రమను కల్పించడానికి, గూగుల్ 'gVisor' అనే టూల్‌ను ఉపయోగించి ఒక పటిష్ఠ‌మైన డిజిటల్ శాండ్‌బాక్స్‌లో 'మిర్రర్ డైమెన్షన్'ను నిర్మించింది. ఏఐ ఒక ప్రముఖ వెబ్‌సైట్‌ను సందర్శించడానికి ప్రయత్నించినప్పుడు, ఒక స్థానిక సిస్టమ్ నిశ్శబ్దంగా దానిని ఒక నకిలీ కాపీకి పంపిస్తుంది. ఇందులో తెలివైన విషయం ఏమిటంటే.. క్రోమ్ అడ్రస్ బార్‌లో వెబ్ చిరునామా మాత్రం మామూలుగానే కనిపిస్తుంది. 

క్రోమ్‌లో కఠినమైన భద్రతా తనిఖీలు ఉన్నందున, బ్రౌజర్ హెచ్చరికలు చూపకుండా ఉండేందుకు ఇంజనీర్లు ఈ శాండ్‌బాక్స్‌లో ప్రత్యేకంగా రూపొందించిన నకిలీ వెబ్ సర్టిఫికేట్లను ఉపయోగించారు. సాధారణ యూజర్లకు నిజమైన ఇంటర్నెట్‌లో హ్యాకర్లు ఇలా చేయడం అసాధ్యమని, ఇది కేవలం తమ నియంత్రణలో ఉన్న ప్రైవేట్ టెస్ట్ నెట్‌వర్క్‌లో మాత్రమే సాధ్యమని గూగుల్ స్పష్టం చేసింది.

నకిలీ వెబ్‌ను నిర్మిస్తున్న ఏఐలు
వేలాది వాస్తవిక వెబ్‌సైట్‌లను మానవులు నిర్మించడం అసాధ్యం. కాబట్టి గూగుల్ ఈ పని కోసం ఇతర ఏఐ ఏజెంట్ల బృందాలను రంగంలోకి దించింది. ముందుగా 'రీసెర్చ్ ఏజెంట్లు' ఒక సైట్‌కు అవసరమైన షాపింగ్ కార్ట్‌లు, ప్రోమో కోడ్ బాక్సులు వంటి ఫీచర్లను ప్లాన్ చేస్తాయి. ఆ తర్వాత 'బిల్డర్ ఏజెంట్లు' అసలు వెబ్‌సైట్ కోడ్‌ను రాస్తాయి. ఇక 'క్రిటిక్ ఏజెంట్లు' క్రోమ్ డెవలపర్ టూల్స్‌ను ఉపయోగించి బటన్లను క్లిక్ చేయడం, స్క్రీన్‌షాట్లు తీయడం, లోపాలను గుర్తించి సరిచేయడానికి వెనక్కి పంపడం వంటివి చేస్తాయి. ఈ ఏఐలన్నీ కలిసి ఆన్‌లైన్ స్టోర్లు, వంటల సైట్లు, బ్యాంకింగ్ డ్యాష్‌బోర్డులతో కూడిన ఒక పూర్తి నకిలీ వెబ్ ప్రపంచాన్ని నిర్మించాయి.

భవిష్యత్ సవాళ్లు, భద్రత
ఈ ప్రాజెక్ట్ యొక్క ప్రధాన లక్ష్యాలలో ఒకటి 'ప్రాంప్ట్ ఇంజెక్షన్' దాడుల నుండి వినియోగదారులను రక్షించడం. ఈ తరహా దాడులలో హ్యాకర్లు ఏఐని హైజాక్ చేయడానికి వెబ్‌పేజీ టెక్స్ట్ లేదా చిత్రాలలో హానికరమైన ఆదేశాలను రహస్యంగా దాచిపెడతారు. ఈ దాడులను గుర్తించేలా ఏఐకి విస్తృతంగా శిక్షణ ఇస్తున్నారు. ప్రస్తుతం పరీక్షిస్తున్న ఏఐ ఏజెంట్లు ప్రమాదకరం కావని, వాటికి హ్యాకింగ్ నైపుణ్యాలు లేవని, అయితే ఏఐ మరింత తెలివిగా మారుతున్న కొద్దీ, ఈ నకిలీ వెబ్‌ను మరింత వాస్తవికంగా తీర్చిదిద్దుతామని గూగుల్ ఇంజనీరింగ్ డైరెక్టర్ డౌగ్ టర్నర్ తెలిపారు.