నన్ను చూడగానే ఏడవడం ఆపేసి ధైర్యం చెప్పింది: చెల్లెలిపై జాన్వీ భావోద్వేగం

దివంగత అతిలోక సుందరి శ్రీదేవి హఠాన్మరణం భారత సినీ పరిశ్రమతో పాటు కోట్లాది మంది అభిమానులను తీవ్ర దిగ్భ్రాంతికి గురిచేసింది. ఆమె మరణించి ఏళ్లు గడుస్తున్నా, కుటుంబ సభ్యులు ఆ విషాదం నుంచి ఇంకా పూర్తిగా తేరుకోలేకపోతున్నారు. ప్రముఖ నిర్మాత, దర్శకుడు కరణ్ జోహార్ వ్యాఖ్యాతగా వ్యవహరిస్తున్న పాపులర్ చాట్ షో 'కాఫీ విత్ కరణ్' సీజన్ 8 లో శ్రీదేవి కుమార్తెలు జాన్వీ కపూర్, ఖుషీ కపూర్ పాల్గొన్నారు. ఈ సందర్భంగా తమ తల్లి మరణవార్త విన్న నాటి భయానక క్షణాలను గుర్తుచేసుకుంటూ ఇద్దరూ తీవ్ర భావోద్వేగానికి లోనయ్యారు.

ఆ రోజు ఇంట్లో ఉన్న సమయంలోనే తమకు ఆ దుర్వార్త తెలిసిందని జాన్వీ కపూర్ వెల్లడించారు. "నాకు ఫోన్ కాల్ వచ్చినప్పుడు నేను నా గదిలోనే ఉన్నాను. పక్క గదిలో నుంచి ఖుషీ గట్టిగా ఏడుస్తున్న శబ్దాలు వినిపించాయి. దాంతో నేను ఏడుస్తూ వెంటనే ఆమె గదిలోకి పరుగుతీశాను. అయితే ఆశ్చర్యకరంగా నన్ను చూడగానే ఖుషీ ఏడవడం ఆపేసింది. నా పక్కనే వచ్చి కూర్చుని, నన్ను ఓదార్చడం మొదలుపెట్టింది. ఆ రోజు తర్వాత తను ఆ విషయంపై ఇప్పటివరకు మళ్లీ ఏడవడం నేను చూడలేదు" అని జాన్వీ పంచుకున్నారు.

ఆ కష్ట సమయంలో తాను ఎందుకు అలా ఉండాల్సి వచ్చిందో ఖుషీ కపూర్ వివరించారు. "నేను ఎప్పుడూ అందరికంటే మానసికంగా దృఢంగా ఉండేదాన్ని. ఆ క్లిష్ట పరిస్థితుల్లో కుటుంబం మొత్తం కోసం నేను గుండె నిబ్బరం చేసుకోవాలని, అందరికీ అండగా నిలబడాలని బలంగా అనుకున్నాను. అందుకే కన్నీళ్లను ఆపుకుని ధైర్యంగా ఉన్నాను" అని ఖుషీ తెలిపారు.

ఇదే క్రమంలో తన సోదరి ఖుషీలో తల్లి శ్రీదేవికి సంబంధించిన కొన్ని లక్షణాలు ఉన్నాయని జాన్వీ పేర్కొన్నారు. ముఖ్యంగా పని విషయంలో ఆమె అచ్చం తల్లిలాగే వ్యవహరిస్తుందని చెప్పారు. "ఖుషీ చాలా నిశ్శబ్దంగా, తన పని తాను చేసుకుపోయే వ్యక్తి. ఆ విషయంలో ఆమె అచ్చం అమ్మలాగే ఉంటుంది. కానీ కెమెరా ముందుకు వచ్చేసరికి మాత్రం పూర్తిగా మారిపోయి అద్భుతంగా నటిస్తుంది" అని జాన్వీ ప్రశంసించారు.

2018 ఫిబ్రవరిలో బోనీ కపూర్ బంధువుల వివాహ వేడుకలో పాల్గొనేందుకు దుబాయ్ వెళ్లిన శ్రీదేవి, అక్కడ ప్రమాదవశాత్తూ బాత్‌టబ్‌లో మునిగిపోయి ప్రాణాలు కోల్పోయిన సంగతి తెలిసిందే. తల్లి హఠాన్మరణం తర్వాత ఈ ఇద్దరు అక్కాచెల్లెళ్లు ఒకరికొకరు తోడుగా ఉంటూ కెరీర్‌లో ముందుకు సాగుతున్నారు.