నందమూరి బాలకృష్ణ కథానాయకుడిగా, దర్శకుడు గోపీచంద్ మలినేని రూపొందిస్తున్న భారీ యాక్షన్ ఎంటర్‌టైనర్ 'దాదా'. ఎంతో ఆసక్తిగా ఎదురుచూస్తున్న ఈ చిత్రం నుంచి మేకర్స్ తొలి పాటను విడుదల చేశారు. 'దాదా ధమాకా' పేరుతో వచ్చిన ఈ పల్సేటింగ్ సాంగ్ అభిమానులను ఉర్రూతలూగిస్తోంది.

ఈ పాట బాలయ్య అభిమానులకు ఫుల్ మీల్స్ లాంటి ట్రీట్ అందిస్తోంది. వైబ్రెంట్ పబ్ బ్యాక్‌డ్రాప్‌లో బాలకృష్ణ, బాలీవుడ్ అందాల భామ నర్గీస్ ఫక్రిపై ఈ పాటను చిత్రీకరించారు. బాలయ్య, గోపీచంద్ మలినేని ఇద్దరితోనూ సూపర్ హిట్ ఆల్బమ్స్ ఇచ్చిన సంగీత దర్శకుడు ఎస్. తమన్, ఈ సినిమాకు కూడా తనదైన శైలిలో అదిరిపోయే ఎనర్జిటిక్ డ్యాన్స్ నంబర్‌ను అందించాడు. రామజోగయ్య శాస్త్రి రాసిన సాహిత్యం పాటకు మరింత ఉత్సాహాన్నిచ్చింది. ఈ పాటలో విశేషమేమిటంటే, గాయని రజని శ్రీ పూర్ణిమతో పాటు బాలకృష్ణ స్వయంగా కొంత భాగం ఆలపించి అభిమానులకు సర్‌ప్రైజ్ ఇచ్చారు.

విజువల్స్‌ పరంగా కూడా ఈ పాట ఆకట్టుకుంటోంది. శేఖర్ వీజే మాస్టర్ తన కొరియోగ్రఫీతో బాలయ్య మార్క్ స్టెప్పులను స్టైలిష్‌గా డిజైన్ చేశారు. సన్ గ్లాసెస్, సిగార్‌తో బాలయ్య పార్టీ అవతార్‌లో కనిపించగా, నర్గీస్ ఫక్రి తన గ్లామర్‌తో స్క్రీన్‌పై మెరిశారు. వీరిద్దరి మధ్య కెమిస్ట్రీ, ఎనర్జిటిక్ డ్యాన్స్ మూమెంట్స్ పాటకు ప్రధాన ఆకర్షణగా నిలిచాయి.

'వీరసింహారెడ్డి' వంటి బ్లాక్‌బస్టర్ తర్వాత బాలకృష్ణ, గోపీచంద్ మలినేని కాంబినేషన్‌లో వస్తున్న రెండో చిత్రమిది. వృద్ధి సినిమాస్ పతాకంపై వెంకట సతీశ్ కిలారు ఈ చిత్రాన్ని భారీ బడ్జెట్‌తో నిర్మిస్తున్నారు. ఇందులో మనోజ్ మంచు, కాజల్ అగర్వాల్ కీలక పాత్రలు పోషిస్తున్నారు.

ఇటీవల గాయం కారణంగా శస్త్రచికిత్స చేయించుకుని విశ్రాంతి తీసుకున్న బాలకృష్ణ, మళ్లీ షూటింగ్‌లో చేరినట్లు చిత్ర యూనిట్ వర్గాలు తెలిపాయి. ప్రస్తుతం సినిమా చిత్రీకరణ చివరి దశకు చేరుకుంది. అరవింద్ ఎస్ కశ్యప్ సినిమాటోగ్రఫీ, నవీన్ నూలి ఎడిటింగ్, సాయి మాధవ్ బుర్రా సంభాషణలు అందిస్తున్నారు. ఈ చిత్రాన్ని డిసెంబర్ 24న క్రిస్మస్ కానుకగా ప్రపంచవ్యాప్తంగా విడుదల చేసేందుకు సన్నాహాలు చేస్తున్నారు.