విశాఖ నూతన మేయర్ ముక్కా శ్రావణికి మంత్రి నారా లోకేశ్ అభినందనలు

విశాఖపట్నం మున్సిపల్ కార్పొరేషన్ ఎన్నికల్లో కూటమి తరఫున టీడీపీ మేయర్ అభ్యర్థిగా బరిలోకి దిగి ఘనవిజయం సాధించిన ముక్కా శ్రావణిని రాష్ట్ర విద్య, ఐటీ శాఖల మంత్రి నారా లోకేశ్ అభినందించారు. విశాఖలో నిర్వహించిన సీఐఐ భాగస్వామ్య సదస్సులో పాల్గొనేందుకు నగరానికి విచ్చేసిన మంత్రి లోకేశ్‌ను బుధవారం సాయంత్రం మేయర్ ముక్కా శ్రావణి మర్యాదపూర్వకంగా కలుసుకున్నారు.

ఈ సందర్భంగా శ్రావణి సాధించిన ఘన విజయాన్ని ప్రస్తావిస్తూ మంత్రి లోకేశ్ ఆమెకు హృదయపూర్వక శుభాకాంక్షలు తెలిపారు. విశాఖపట్నం తెలుగుదేశం పార్టీకి బలమైన కంచుకోట అని ఈ ఫలితాల ద్వారా మరోసారి స్పష్టంగా నిరూపితమైందని ఆయన పేర్కొన్నారు. కూటమికి ప్రజలు అందించిన మద్దతు ఎంతో గొప్పదని, ప్రజల ఆకాంక్షలకు అనుగుణంగా నగర అభివృద్ధికి కృషి చేయాలని సూచించారు.

ఇదే క్రమంలో పార్టీ భవిష్యత్ కార్యాచరణపైనా మంత్రి లోకేశ్ స్పందించారు. రాష్ట్రంలో త్వరలో జరగబోయే 23 మున్సిపల్, కార్పొరేషన్ ఎన్నికల్లోనూ ఇదే జోరును కొనసాగించేలా పక్కా ప్రణాళికలతో ముందుకు వెళుతున్నామని తెలిపారు. ఆయా ఎన్నికల్లో కూటమి అభ్యర్థుల విజయానికి గట్టిగా కృషి చేసేందుకు వీలుగా, ఇటీవల గెలుపొందిన ప్రతినిధులకు కీలక బాధ్యతలు అప్పగిస్తామని ఆయన స్పష్టం చేశారు.