దీపావళి విమాన చార్జీల మోత: డబ్బులు ఆదా చేద్దామని రైలెక్కాడు.. చివరకు లబోదిబోమన్న కంపెనీ సీఈవో!

పండుగ వేళ విమాన ఛార్జీలు భారీగా పెరిగిపోవడంతో బడ్జెట్ ఆదా చేసుకునేందుకు రైలు ప్రయాణాన్ని ఎంచుకున్న ఓ కంపెనీ సీఈవోకు చేదు అనుభవం ఎదురైంది. మధ్యప్రదేశ్‌లోని ఇండోర్ నుంచి ఉత్తరప్రదేశ్‌లోని లక్నోకు కుటుంబంతో సహా ప్రయాణించిన ప్రముఖ వ్యాపారవేత్త వైభవ్ జైన్.. తాను ఎక్కిన మహాకాల్ ఎక్స్‌ప్రెస్ దాదాపు 8 గంటలు ఆలస్యంగా నడవడంతో తీవ్ర అసహనం వ్యక్తం చేశారు.

'క్యాపిటల్ క్విల్', 'వైభవ్ జైన్ క్లాసెస్' వ్యవస్థాపకుడైన వైభవ్ జైన్ దీపావళి పండుగ కోసం కుటుంబంతో కలిసి లక్నో వెళ్లేందుకు ప్లాన్ చేసుకున్నారు. పండుగ రద్దీ వల్ల విమాన టికెట్ల ధరలు విపరీతంగా పెరగడం, మరోవైపు తన రెండేళ్ల కుమార్తెకు మంచి ప్రయాణ అనుభూతిని ఇవ్వాలనే ఉద్దేశంతో ఆయన కారు ప్రయాణాన్ని కాదని రైలును ఎంచుకున్నారు. షెడ్యూల్ ప్రకారం ఈ ప్రయాణం 14 గంటల్లో పూర్తి కావాల్సి ఉండగా, రైలు దాదాపు ఏడున్నర నుంచి ఎనిమిది గంటలు ఆలస్యంగా నడవడంతో తీవ్ర ఇబ్బంది పడ్డారు.

ఈ పరిణామంపై ఆయన సోషల్ మీడియా ప్లాట్‌ఫామ్ 'ఎక్స్' వేదికగా రైల్వే మంత్రిత్వ శాఖను ట్యాగ్ చేస్తూ తన నిరాశను వ్యక్తం చేశారు. "రైల్వేలు ఇలాంటి జాప్యాలతో విమానయాన సంస్థలతో ఎలా పోటీపడగలవు? రైలు ప్రయాణాన్ని ఎంచుకుని పెద్ద తప్పు చేశాను" అంటూ ఆవేదన వ్యక్తం చేశారు.

ఈ పోస్ట్ సామాజిక మాధ్యమాల్లో విస్తృతంగా చర్చనీయాంశమైంది. పలువురు నెటిజన్లు  రైళ్ల సమయపాలన లోపాలను ఎత్తిచూపుతూ ఆయనకు మద్దతు తెలిపారు. మరికొందరు మాత్రం పండుగల సీజన్ రద్దీ, ట్రాక్ విస్తరణ పనుల వల్లే ఆలస్యం జరుగుతోందని అభిప్రాయపడ్డారు. 

పండుగల సమయంలో విమాన ఛార్జీలు సాధారణం కంటే మూడు, నాలుగు రెట్లు పెరుగుతున్న నేపథ్యంలో ప్రయాణికులు ఎక్కువగా ఆధారపడే రైల్వే సేవల్లో పారదర్శకత, సమయపాలన మరింత మెరుగుపడాల్సిన అవసరం ఉందని ఈ ఘటన మరోసారి గుర్తుచేసింది.