వెల్లింగ్‌టన్‌లోని బేసిన్ రిజర్వ్ వేదికగా జ‌రుగుతున్న‌ రెండో వన్డేలో భారత బౌలర్లు చెలరేగారు. యువ పేసర్ గూరనూర్ బ్రార్ నిప్పులు చెరిగే బంతులతో కివీస్ పతనాన్ని శాసించడంతో న్యూజిలాండ్ జట్టు 40.6 ఓవర్లలో కేవలం 134 పరుగులకే ఆలౌటైంది. టాస్ గెలిచి ఫీల్డింగ్ ఎంచుకున్న భారత్‌కు ఆరంభంలోనే అద్భుతమైన ఆరంభం లభించింది. 

పేసర్ ఆఖిబ్ నబీ తన తొలి ఓవర్లోనే టిమ్ సీఫర్ట్ (0)ను పెవిలియన్ చేర్చాడు. ఆ వెంటనే మరో ఓపెనర్ విల్ యంగ్ (6)ను కూడా ఔట్ చేసి కివీస్‌ను గట్టి దెబ్బ కొట్టాడు. ఆ తర్వాత బౌలింగ్‌కు వచ్చిన అన్షుల్ కంబోజ్.. హెన్రీ నికోల్స్ (11)ను బౌల్డ్ చేయడంతో న్యూజిలాండ్ 9 ఓవర్లలోనే 23 పరుగులకే 3 వికెట్లు కోల్పోయి పీకల్లోతు కష్టాల్లో పడింది.

మధ్య ఓవర్లలో గూరనూర్ బ్రార్ తన ప్రతాపం చూపించాడు. ఒకే ఓవర్లో టామ్ లాథమ్ (7), గ్లెన్ ఫిలిప్స్ (0)ను ఔట్ చేసి కివీస్ బ్యాటింగ్ ఆర్డర్ నడ్డి విరిచాడు. దీంతో న్యూజిలాండ్ 53 పరుగులకే 5 వికెట్లు కోల్పోయి ఘోర పతనం అంచున నిలిచింది. ఈ క్లిష్ట పరిస్థితుల్లో డారిల్ మిచెల్ (104 బంతుల్లో 55) ఒంటరి పోరాటం చేశాడు. కెప్టెన్ మిచెల్ శాంట్నర్‌ (38 బంతుల్లో 31)తో కలిసి ఆరో వికెట్‌కు 59 పరుగుల కీలక భాగస్వామ్యం నెలకొల్పాడు.

ప్రమాదకరంగా మారుతున్న ఈ జోడీని స్పిన్నర్ అక్షర్ పటేల్ విడదీశాడు. అర్ధశతకం పూర్తి చేసుకున్న మిచెల్‌ను ఔట్ చేసి భారత్‌కు బ్రేక్ ఇచ్చాడు. ఆ తర్వాత బ్రార్.. శాంట్నర్‌ను, నాథన్ స్మిత్‌ను ఔట్ చేశాడు. చివర్లో అక్షర్, కంబోజ్ తలా ఒక వికెట్ తీయడంతో కివీస్ ఇన్నింగ్స్ 134 పరుగుల వద్ద ముగిసింది. భారత బౌలర్లలో గూరనూర్ బ్రార్ 10 ఓవర్లలో 30 పరుగులిచ్చి 4 వికెట్లు పడగొట్టగా, ఆఖిబ్ నబీ, అన్షుల్ కంబోజ్, అక్షర్ పటేల్ తలో రెండు వికెట్లు సాధించారు.