భారత సీనియర్ పేసర్ మహమ్మద్ షమీ అనూహ్యంగా టెస్ట్ క్రికెట్‌కు రిటైర్మెంట్ ప్రకటించడంపై మాజీ హెడ్ కోచ్ రవిశాస్త్రి స్పందించాడు. సుదీర్ఘకాలంగా సెలక్టర్లు తనను పక్కన పెట్టడంతోనే షమీ ఈ కఠిన నిర్ణయం తీసుకున్నాడని, ఇది చాలా బాధాకరమని అన్నాడు. షమీ విషయంలో సెలక్టర్లు అనుసరించిన వైఖరిపై తీవ్ర అసంతృప్తి వ్యక్తం చేశాడు. గత మూడేళ్లుగా టెస్ట్ జట్టులో చోటు దక్కకపోవడంతో షమీ తన రెడ్-బాల్ కెరీర్‌కు ముగింపు పలికిన సంగతి తెలిసిందే.

ఈ నిర్ణయంపై భారత్-న్యూజిలాండ్ రెండో వన్డే సందర్భంగా రవిశాస్త్రి మాట్లాడుతూ.. "దేశం కోసం అద్భుతంగా ఆడిన ఒక ఆటగాడు ఇలా తప్పుకోవడం విచారకరం. అతనిలో ఇంకా 30 నుంచి 40 టెస్ట్ వికెట్లు తీసే సత్తా ఉందని నేను కచ్చితంగా భావించాను. గత 12 నెలల్లో అతనికి అవకాశం ఇచ్చి ఉండాల్సింది. ఒక టెస్ట్ మ్యాచ్ బౌలర్‌గా అతను జట్టులో ఉండాల్సింది" అని అభిప్రాయపడ్డాడు.

ఆటగాళ్ల ఫిట్‌నెస్‌ను అంచనా వేయడానికి కేవలం జిమ్-ఆధారిత పరీక్షలపై ఆధారపడటాన్ని కూడా శాస్త్రి తప్పుబట్టాడు. "ఒక మ్యాచ్‌లో 10 లేదా 12 ఓవర్లు బౌలింగ్ చేయలేకపోతే జిమ్‌లో ఫిట్‌గా ఉండి ఏం ప్రయోజనం? ఇక్కడ మీకు ఒక వర్క్‌హార్స్ (కష్టపడి పనిచేసే బౌలర్) అందుబాటులో ఉన్నాడు. అతనికి మరో అవకాశం ఇవ్వకపోవడం నన్ను తీవ్రంగా నిరాశపరిచింది" అని శాస్త్రి ఆవేదన వ్యక్తం చేశాడు.

షమీ ఫిట్‌నెస్‌పై వస్తున్న నివేదికలను కూడా శాస్త్రి కొట్టిపారేశాడు. "అతను ఫిట్‌గా లేడని కొన్ని పత్రికా కథనాలు నేను చూశాను. కానీ, అతను బెంగాల్ తరఫున అన్ని దేశవాళీ మ్యాచ్‌లూ ఆడాడు. ప్రతి మ్యాచ్‌లో 15-20 ఓవర్లు బౌలింగ్ చేశాడు. ఒక ఆటగాడు తన ఫిట్‌నెస్‌ను నిరూపించుకోవడానికి ఇంతకంటే ఏం చేయాలి?" అని ప్రశ్నించాడు.

గత రంజీ ట్రోఫీ సీజన్‌లో 7 మ్యాచ్‌ల్లో 37 వికెట్లు పడగొట్టి అద్భుత ఫామ్‌లో ఉన్నప్పటికీ, షమీకి సెలక్టర్ల నుంచి పిలుపు రాలేదు. ఈ నిరాశతోనే అత‌డు సుదీర్ఘ ఫార్మాట్‌కు వీడ్కోలు పలికాడు. అయితే, వన్డేలు, టీ20ల వంటి వైట్-బాల్ క్రికెట్‌లో మాత్రం కొనసాగుతానని షమీ స్పష్టం చేశాడు.