మురసు తుపాను ప్రభావం, సహాయక చర్యలపై ముఖ్యమంత్రి చంద్రబాబు ఉన్నతాధికారులు, జిల్లా కలెక్టర్లతో టెలికాన్ఫరెన్స్ నిర్వహించారు. తుపాను తదనంతర పరిస్థితులను ఎదుర్కొనేందుకు తీసుకోవాల్సిన చర్యలపై అధికారులకు స్పష్టమైన దిశానిర్దేశం చేశారు. ఒంగోలు-బాపట్లకు సమీపంలో గంటకు 120 కిలోమీటర్ల వేగంతో తుపాను పయనిస్తోందని, రానున్న 4 నుంచి 5 గంటల సమయం అత్యంత కీలకమని అధికారులు సీఎంకు వివరించారు.

ఈ సందర్భంగా చంద్రబాబు మాట్లాడుతూ.. ప్రాణనష్టం జరగకుండా చూడటమే ప్రభుత్వ ప్రథమ ప్రాధాన్యమని స్పష్టం చేశారు. చివరి వ్యక్తికి కూడా సహాయం అందే వరకు ప్రభుత్వ యంత్రాంగం విశ్రమించవద్దని ఆదేశించారు. "ఈరోజు సాయంత్రం వరకు ప్రజలు ఇళ్ల నుంచి బయటకు రావద్దు. ప్రభుత్వం జారీ చేసే సూచనలను తప్పక పాటించాలి. క్షేత్రస్థాయిలో అధికారులు తక్షణమే స్పందిస్తుండటంతో బాధితుల్లో భరోసా కనిపిస్తోంది" అని తెలిపారు.

తుపాను ప్రభావిత జిల్లాలైన ప్రకాశం, బాపట్లలో వర్షపాతం పెరిగిందని, వీటితో పాటు గుంటూరు, పల్నాడు, కృష్ణా, ఎన్టీఆర్, ఏలూరు, పశ్చిమగోదావరి జిల్లాల్లో కూడా వర్షాలు కొనసాగుతాయని సీఎం తెలిపారు. ముఖ్యంగా 21 పట్టణ ప్రాంతాల్లో అధిక వర్షపాతం నమోదవుతోందని చెప్పారు. విద్యుత్ సరఫరాకు అంతరాయం ఏర్పడిన ప్రకాశం, బాపట్ల, పల్నాడు, గుంటూరు జిల్లాల్లో పునరుద్ధరణ పనులను యుద్ధప్రాతిపదికన చేపట్టాలని ఆదేశించారు.

జిల్లా కలెక్టర్లు తమ తమ ప్రాంతాల్లో చేపట్టిన చర్యలను సీఎంకు వివరించారు. ఒంగోలులో పలుచోట్ల పడిపోయిన చెట్లను వెంటనే తొలగించినట్లు, నెల్లూరు జిల్లాలో వ్యవసాయ భూముల్లో నీరు నిలవకుండా చర్యలు తీసుకుంటున్నట్లు తెలిపారు. చెరువులు, రిజర్వాయర్లు ప్రమాదకర స్థాయిలో లేనప్పటికీ, నిరంతరం అప్రమత్తంగా ఉండాలని చంద్రబాబు సూచించారు. తుపాను సమయంలో అద్భుతంగా పనిచేసిన అధికారుల నుంచి క్షేత్రస్థాయి సిబ్బంది వరకు అందరినీ ఆయన అభినందించారు. ఈరోజు రాత్రికి తుపాను తీవ్రత పూర్తిగా తగ్గే అవకాశం ఉందని అధికారులు అంచనా వేస్తున్నారు.