భారత టెలికాం రంగంలో కీలక సంస్కరణలకు 'టెలికాం రెగ్యులేటరీ అథారిటీ ఆఫ్ ఇండియా' (ట్రాయ్) శ్రీకారం చుట్టింది. ఒక నెట్‌వర్క్ నుంచి మరో నెట్‌వర్క్‌కు కాల్స్‌ను సజావుగా అనుసంధానం చేసే ఇంటర్‌కనెక్షన్ వ్యవస్థను ఆధునికీకరిస్తూ 'టెలికమ్యూనికేషన్ ఇంటర్‌కనెక్షన్ (మూడో సవరణ) రెగ్యులేషన్స్-2026'ను నేడు విడుదల చేసింది. ఈ కొత్త నిబంధనలు 2027 జనవరి 1 నుంచి అమలులోకి రానున్నాయి. ఈ మార్పుల ద్వారా కాల్ క్వాలిటీ మెరుగుపడటంతో పాటు నెట్‌వర్క్ సామర్థ్యం కూడా పెరగనుంది.

ప్రస్తుతం షార్ట్ డిస్టెన్స్ ఛార్జింగ్ ఏరియా (ఎస్‌డీసీఏ), లాంగ్ డిస్టెన్స్ ఛార్జింగ్ ఏరియా (ఎల్‌డీసీఏ) స్థాయిలో ఉన్న ఇంటర్‌కనెక్షన్ పాయింట్లను ఇకపై 'లైసెన్స్డ్ సర్వీస్ ఏరియా' (ఎల్ఎస్ఏ) స్థాయికి మార్చనున్నారు. ప్రస్తుతం ఉన్న ట్రాఫిక్‌ను మూడేళ్లలో దశలవారీగా ఎల్ఎస్ఏ స్థాయికి బదిలీ చేయాలని ట్రాయ్ ఆదేశించింది. ఈ మార్పు వల్ల రూటింగ్ సులభతరం అవుతుంది, కాల్స్ కనెక్ట్ అయ్యే సమయం (లేటెన్సీ) తగ్గుతుంది, సర్వీసుల్లో విశ్వసనీయత పెరుగుతుంది.

మరో కీలకమైన మార్పు ఏమిటంటే, మొత్తం ఇంటర్‌కనెక్షన్ వ్యవస్థను పాత ఈ1/టీడీఎం టెక్నాలజీ నుంచి ఆధునిక ఇంటర్నెట్ ప్రోటోకాల్ ఆధారిత టెక్నాలజీకి మార్చడం. కొత్తగా ఏర్పాటు చేసే అన్ని ఇంటర్‌కనెక్షన్లు తప్పనిసరిగా ఐపీ ఆధారితంగానే ఉండాలని ట్రాయ్ స్పష్టం చేసింది. ఇప్పటికే ఉన్న పాత టెక్నాలజీ పాయింట్లను కూడా మూడేళ్లలోపు పూర్తిగా ఐపీ టెక్నాలజీకి మార్చాల్సి ఉంటుంది. దీనివల్ల బ్యాండ్‌విడ్త్ వినియోగం మెరుగుపడి, కాల్ క్వాలిటీ గణనీయంగా పెరుగుతుంది.

ఈ సవరణల్లో భాగంగా మరికొన్ని కొత్త నిబంధనలను కూడా ట్రాయ్ ప్రవేశపెట్టింది. టెలికం సంస్థలు తమ కార్యాచరణ అవసరాల కోసం పీఓఐలను స్వచ్ఛందంగా అప్పగించేందుకు (సరెండర్) వీలు కల్పించింది. గతంలో కేవలం డిస్‌కనెక్షన్ నిబంధన మాత్రమే ఉండేది. 

దీంతో పాటు ఇంటర్‌కనెక్షన్ ఛార్జీల చెల్లింపు ఆలస్యమైతే విధించే వడ్డీపై కూడా స్పష్టత ఇచ్చింది. ఎస్‌బీఐ ఒక ఏడాది ఎంసీఎల్ఆర్ రేటుకు 2% అదనంగా వడ్డీని వసూలు చేసుకోవచ్చు. బ్యాంక్ గ్యారంటీల కాలపరిమితిని 6 నెలల నుంచి 12 నెలలకు పొడిగించింది. ఈ నిబంధనల అమలును పర్యవేక్షించడానికి, ఉల్లంఘించిన సంస్థలపై దశలవారీగా ఆర్థిక జరిమానాలు విధించడానికి కూడా ఒక పటిష్ఠమైన యంత్రాంగాన్ని ఏర్పాటు చేస్తున్నట్లు ట్రాయ్ తెలిపింది.