ఫోన్ దొంగకు షాకింగ్ ట్రీట్‌మెంట్.. కదులుతున్న రైలుకు వేలాడిన దొంగ!

కదులుతున్న రైలులో ప్రయాణికుడి నుంచి సెల్ ఫోన్ లాక్కోవడానికి ప్రయత్నించిన ఓ దొంగకు ఊహించని అనుభవం ఎదురైంది. అప్రమత్తమైన ప్రయాణికులు అతడి చేతులను గట్టిగా పట్టుకోవడంతో, రైలు ముందుకు కదులుతున్నా వారు పట్టు వదల్లేదు. దీంతో ఆ దొంగ రైలు బయటే వేలాడుతూ కొంత దూరం ప్రయాణించాల్సి వచ్చింది. బిహార్‌లో జరిగిన ఈ షాకింగ్ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.

బిహార్‌లోని భాగల్‌పూర్ జిల్లా శివనారాయణ్‌పూర్ రైల్వే స్టేషన్‌లో ఈ ఘటన చోటుచేసుకుంది. స్టేషన్ నుంచి రైలు నెమ్మదిగా కదులుతుండగా, ప్లాట్‌ఫామ్‌పై ఉన్న ఓ వ్యక్తి కిటికీలోంచి చేయి పెట్టి ప్రయాణికుడి మొబైల్ ఫోన్‌ను లాక్కోవడానికి ప్రయత్నించాడు. వెంటనే స్పందించిన ప్రయాణికులు అతడి చేతులను గట్టిగా పట్టుకున్నారు. ప్లాట్‌ఫామ్ నుంచి రైలు వేగం పుంజుకుంటున్నా వారు పట్టు విడవకపోవడంతో, ఆ దొంగ రైలుతో పాటే బయట వేలాడుతూ ఉండిపోయాడు.

ప్లాట్‌ఫామ్‌పై కొంత దూరం వరకు ఆ దొంగ రైలుకు వేలాడుతూనే కనిపించాడు. రైలు వేగంగా వెళ్తుండటంతో ప్రాణభయంతో కేకలు పెట్టాడు. చివరికి పట్టు తప్పి ప్లాట్‌ఫామ్‌పై పడిపోగా, అక్కడే ఉన్న భద్రతా సిబ్బంది అతడిని అదుపులోకి తీసుకున్నారు.