జగన్ ను విమర్శించడానికే సభ పెట్టారు: రవీంద్రనాథ్ రెడ్డి

ప్రొద్దుటూరులో నిర్వహించిన జల్ జీవన్ మిషన్ సభ కేవలం ప్రచారం కోసమేనని... మాజీ ముఖ్యమంత్రి జగన్ ను విమర్శించడానికే పెట్టారని వైసీపీ కడప జిల్లా అధ్యక్షుడు రవీంద్రనాథ్ రెడ్డి ఆరోపించారు. గత వైసీపీ ప్రభుత్వ హయాంలో పూర్తి చేసిన పనులకు ప్రస్తుత కూటమి ప్రభుత్వం క్రెడిట్ కొట్టేస్తోందని విమర్శించారు.

గత ప్రభుత్వ హయాంలోనే ఇంటింటికీ తాగునీటి కుళాయి కనెక్షన్లు, ఇళ్ల స్థలాల పట్టాల పంపిణీ ప్రారంభమయ్యాయని రవీంద్రనాథ్ రెడ్డి గుర్తుచేశారు. ప్రొద్దుటూరు-మైలవరం రిజర్వాయర్ తాగునీటి ప్రాజెక్టు పనులు 90 శాతానికి పైగా తమ హయాంలోనే పూర్తయ్యాయని, 2022లోనే విజయవంతంగా ట్రయల్ రన్ కూడా నిర్వహించామని తెలిపారు. అలాగే, రూ.700 కోట్లతో ఉద్దానం కిడ్నీ బాధితుల కోసం శాశ్వత తాగునీటి ప్రాజెక్టును చేపట్టింది కూడా తమ ప్రభుత్వమేనని అన్నారు.

ప్రస్తుత ప్రభుత్వం ఉచిత ఇసుక పేరుతో కృష్ణా నదిని దోచుకుంటోందని ఆయన ఆరోపించారు. గతంలో రూ.6,000 ఉన్న ఇసుక ధర ఇప్పుడు రూ.28,000కు చేరిందని విమర్శించారు. ఇంటింటికీ తాగునీరు ఇవ్వడంలో విఫలమైన ప్రభుత్వం, ఇంటింటికీ మద్యం సరఫరా అయ్యేలా చూస్తోందని ఎద్దేవా చేశారు. కమీషన్ల కోసం రూ.11,000 కోట్ల విలువైన టెండర్లను రద్దు చేసి, మళ్లీ అవే పనులకు రీ-టెండర్లు పిలుస్తున్నారని ఆరోపించారు. కూటమి ప్రభుత్వ పనితీరును ప్రజలు గమనిస్తున్నారని, తగిన సమయంలో సరైన బుద్ధి చెబుతారని రవీంద్రనాథ్ రెడ్డి హెచ్చరించారు.