చంద్రబాబు వాటర్ మ్యాన్ కాదు.. అంతా ఆర్భాటమే: శ్రీకాంత్ రెడ్డి

ఆంధ్రప్రదేశ్ ప్రభుత్వం రాయలసీమలో లక్ష కోట్ల రూపాయల భారీ హార్టికల్చర్ హబ్ ప్రాజెక్టుకు శ్రీకారం చుట్టిన సంగతి తెలిసిందే. మరోవైపు, ప్రభుత్వం తీవ్ర కరవు పరిస్థితులను విస్మరిస్తోందంటూ వైసీపీ తీవ్రస్థాయిలో విమర్శలు గుప్పించింది. వైసీపీ రాష్ట్ర ప్రధాన కార్యదర్శి గడికోట శ్రీకాంత్ రెడ్డి రాయచోటిలో విలేకరులతో మాట్లాడుతూ.. ప్రభుత్వంపై ఘాటు వ్యాఖ్యలు చేశారు. అన్నమయ్య జిల్లాలో 78.7 శాతం వర్షపాతం లోటు ఉందని, నీళ్లు లేక 800 అడుగుల లోతుకు బోర్లు వేసినా రైతులు అప్పులపాలవుతున్నారని ఆవేదన వ్యక్తం చేశారు. మామిడి, నిమ్మ తోటలు ఎండిపోతున్నా ప్రభుత్వం పట్టించుకోకుండా, లక్ష కోట్ల హబ్ పేరుతో ప్రచార ఆర్భాటాలు చేస్తోందని ఆరోపించారు. "చంద్రబాబు వాటర్ మ్యాన్ కాదు, ఆయన అసలైన డ్రాట్ మ్యాన్ (కరవు మనిషి)" అని శ్రీకాంత్ రెడ్డి ఎద్దేవా చేశారు.

టమాటా, మిర్చి, ఉల్లి, అరటి రైతులకు గిట్టుబాటు ధర లేక ఇబ్బంది పడుతుంటే, ప్రభుత్వం బస్సు యాత్రలు, హెలికాప్టర్ పర్యటనలకు కోట్లు ఖర్చు చేస్తోందని విమర్శించారు. నష్టపోయిన ఖరీఫ్ పంటలకు ఎకరాకు రూ. 25,000, సాగు చేయని భూములకు రూ. 15,000 తక్షణమే పరిహారంగా ఇవ్వాలని డిమాండ్ చేశారు. ఉద్యాన పంటలకు ప్రత్యేక ప్యాకేజీ ప్రకటించి, కరవు మండలాలను గుర్తించాలని కోరారు.

ప్రభుత్వం మాత్రం ఈ ప్రాజెక్టు ద్వారా రాయలసీమ రూపురేఖలు మారుస్తామని చెబుతోంది. 2029 నాటికి మూడు దశల్లో పూర్తిచేయనున్న ఈ హబ్ ద్వారా 9.6 లక్షల రైతు కుటుంబాలకు లబ్ధి చేకూరుతుందని, ఉద్యాన పంటల ఉత్పత్తిని రెట్టింపు చేస్తామని ప్రకటించింది. ఏదిఏమైనా, ప్రభుత్వం దీర్ఘకాలిక ప్రణాళికలపై దృష్టి సారిస్తుంటే, తక్షణమే రైతులను ఆదుకోవాలని ప్రతిపక్షాలు డిమాండ్ చేస్తున్నాయి.