బెంగాల్‌లో హలాల్ మాంసం వివాదం: రెస్టారెంట్ వద్ద బీజేపీ ఆందోళన

పశ్చిమ బెంగాల్‌లోని ఒక రెస్టారెంట్‌లో కేవలం 'హలాల్' మాంసం మాత్రమే వడ్డిస్తుండటంపై బీజేపీ కార్యకర్తలు ఆందోళన చేపట్టారు. మెనూలో మాంసం రకాన్ని స్పష్టంగా పేర్కొనకుండా హిందూ వినియోగదారులను, తప్పుదోవ పట్టిస్తున్నారని వారు ఆరోపించారు. నదియా జిల్లాలో ఈ ఉదంతం చోటుచేసుకుంది.

జాతీయ రహదారి-12పై భట్‌జంగ్లా సమీపంలో ఉన్న 'మదర్స్ హట్' రెస్టారెంట్‌‌కు వెళ్లిన బీజేపీ కార్యకర్తలు, అక్కడ వడ్డిస్తున్న మాంసం రకంపై సిబ్బందిని, వినియోగదారులను ఆరా తీశారు. తమ వద్ద కేవలం హలాల్ మాంసం మాత్రమే అందుబాటులో ఉందని సిబ్బంది చెప్పడంతో వివాదం రాజుకుంది. 'ఝట్కా' మాంసం గురించి ప్రశ్నించగా, లేదని సమాధానం రావడంతో ఇరువర్గాల మధ్య వాగ్వాదం చోటుచేసుకుంది.

ఈ క్రమంలో ఆగ్రహం వ్యక్తం చేసిన కార్యకర్తలు రెస్టారెంట్ వెలుపల సుమారు రెండు గంటల పాటు నిరసన చేపట్టారు. మెనూ కార్డులో మాంసం రకాన్ని స్పష్టంగా తెలియజేయాలని, అలాగే ఝట్కా మాంసాన్ని కూడా అందుబాటులో ఉంచాలని వారు డిమాండ్ చేశారు. సమాచారం అందుకున్న కృష్ణానగర్ కొత్వాలి పోలీస్‌లు ఘటనా స్థలానికి చేరుకుని, ఇరు పక్షాలతో చర్చలు జరిపి పరిస్థితిని అదుపులోకి తెచ్చారు. దీంతో ఈ ఆందోళన శాంతియుతంగా ముగిసింది.