హర్యానా రాష్ట్రంలో తీవ్ర విషాదం చోటుచేసుకుంది. అంతర్జాతీయ కబడ్డీ క్రీడాకారుడు శీలు బల్హారా భార్య ముస్కాన్ (23) ఆత్మహత్యకు పాల్పడ్డారు. రోహ్‌తక్ జిల్లాలోని మెహమ్ ప్రాంతంలో గల వారి నివాసంలో ఈ ఘటన జరిగింది. సమాచారం అందుకున్న పోలీసులు వెంటనే సంఘటనా స్థలానికి చేరుకుని దర్యాప్తు ప్రారంభించారు.

పోలీసులు వెల్లడించిన వివరాల ప్రకారం, శీలు బల్హారా, ముస్కాన్‌లకు 2023 డిసెంబర్‌లో వివాహం జరిగింది. వీరికి గత నవంబర్‌లో హార్దిక్ అనే కుమారుడు జన్మించాడు. అయితే, శుక్రవారం ముస్కాన్ తన ఇంట్లో బలవన్మరణానికి పాల్పడ్డారు. ఫోరెన్సిక్ బృందం ఘటనా స్థలాన్ని పరిశీలించి, కీలక ఆధారాలను సేకరించింది.

ముస్కాన్ ఆత్మహత్యకు గల కచ్చితమైన కారణాలు ఇంకా తెలియరాలేదని పోలీసులు తెలిపారు. ఆమె మరణానికి ఒకరోజు ముందు ఒక పంజాబీ పాటకు సంబంధించిన సోషల్ మీడియా రీల్‌ను షేర్ చేసినట్లు గుర్తించారు. ఆమె ఇటీవలి కార్యకలాపాలు, వ్యక్తిగత పరిస్థితులపై పోలీసులు ప్రస్తుతం ఆరా తీస్తున్నారు.